Qamchiqda kuchli qor yog‘yapti, dovonda harakatlana olmagan haydovchilarga yordam ko‘rsatilyapti

Favqulodda vaziyatlar vazirligi qutqaruvchilari Qamchiq dovonida harakatlana olmagan avtomobillarning haydovchilarga yordam ko‘rsatmoqda.

Foto: Videodan kadr

Bugun, 27 dekabr kuni Qamchiq dovonida kuchli qor yog‘ishi va shamol kuzatilmoqda.

FVV xabariga ko‘ra, ayrim haydovchilar bunday ob-havo sharoitida harakatlanishga tayyor emasligi kuzatilgan, natijada ularning avtomashinalariga FVV qutqaruvchilari tomonidan yordam ko‘rsatilib kerakli manzilgacha yetkazilmoqda.

Ayni damda Qamchiq dovonida harakat ikki tomonlama tashkil etilgani, vaziyat nazorat ostida ekani aytiladi.

Avvalroq «O‘zgidromet» Toshkent shahrini va respublika g‘arbiy hududlarini vodiy viloyatlari bilan bog‘lovchi Qamchiq dovonida 27 dekabr kuni qor yog‘ishi, vaqti-vaqti bilan tuman kuzatilishi, yaxmalak yuzaga kelishi kutilayotgani to‘g‘risida xabar bergandi.

«2023 yil 27 dekabr kuni A-373 «Toshkent – O‘sh» avtoyo‘lining Qamchiq dovonidan o‘tgan qismida qor yog‘ishi, vaqti-vaqti bilan kuchli yog‘ingarchilik va tuman kuzatilishi, ko‘rinuvchanlik 50 metrgacha pasayishi, shamol tezligi 15 – 20 metr/soniyagacha kuchayishi natijasida avtoyo‘lda yaxmalak va qor uyumlari yuzaga kelishiga olib kelishi mumkin», deyilgan xabarda.

#qor #Qamchiq