«Biz bunga hech qachon jim qarab turolmaymiz» - prezident jinoyatchilik va korrupsiyaga qarshi kurash tadbirlari haqida

Prezident Shavkat Mirziyoyev so‘nggi haftalarda korrupsiya va jinoyatchilikka qarshi kurashish bo‘yicha amalga oshirilayotgan tezkor tadbirlar haqida fikr bildirdi.

«O‘zini “ko‘cha” deb ataydigan jinoiy guruhlar bo‘ladimi, korrupsiyaga berilgan mansabdor shaxslar bo‘ladimi, kim qonunga bepisand qarab, davlat va jamiyatga zarar yetkazadigan bo‘lsa, biz bunga hech qachon jim qarab turolmaymiz.

Ko‘chalarimiz, mahallalarimiz, hayotimiz tom ma’noda tinch va toza, jinoyatdan xoli bo‘lishi kerak. 

Yangi O‘zbekistonda qonun ustuvor, jinoyatga jazo muqarrar bo‘lishi shart. Va albatta shunday bo‘ladi», - dedi prezident.

• 2023 yil noyabr oyi oxirida O‘zbekistonda, rasmiylar ta’rifiga ko‘ra, «kriminogen vaziyatni yaxshilash bo‘yicha tezkor-profilaktik tadbirlar» boshlandi. Toshkentdagi reydlarning o‘zida o‘tgan vaqt davomida qo‘lga olinganlar soni 100 dan oshadi. Ular orasida «Salimboy» laqabi bilan tanilgan Salim Abduvaliyev, «Baxti Tashkenskiy» laqabi bilan tanilgan Baxtiyor Qudratullayev hamda «Saydaziz medgorodok» laqabi bilan tanilgan Saidaziz Saidaliyev ham bor.
• Shuningdek, korrupsiyaga yo‘l qo‘yishda gumonlangan mansabdorlar qo‘lga olinmoqda, ular orasida sobiq qishloq xo‘jaligi vaziri Aziz Voitov, Namangan viloyati hokimi o‘rinbosari Saidahmad Sultonov, Markaziy bankning Buxoro viloyati bosh boshqarmasi boshlig‘i Erkin Mansurov, Bekobod tuman hokimi Shuhrat Mirzayev, Buxoro tumani sobiq hokimi Xayrullo Jo‘rayev kabilar bor. Bundan tashqari, soliq idoralarining uch nafar mansabdori qamoqqa olingan, sug‘urta kompaniyasi bilan 145 mlrd so‘mni o‘zlashtirmoqchi bo‘lgan bojxona xodimi ham hibsda.