Toshkentdagi choyxonada qimor o‘yinlarini tashkil etgan shaxsga sud hukmi o‘qildi

Ushbu shaxs joriy yil 20 may kuni huquq-tartibot idoralari xodimlari tomonidan Sergeli tumanida joylashgan choyxonada jinoyat ustida qo‘lga olingandi.

Foto: Videodan kadr

Sergeli tuman sudi tomonidan choyxonada qimor o‘yinlarini tashkil qilib kelgan shaxsga hukm o‘qilgan. Bu haqda Oliy sud matbuot kotibi xabar bermoqda.

Ma’lum qilinishicha, joriy yil 20 may huquq-tartibot idoralari tomonidan o‘tkazilgan tezkor tadbirda Sergeli tumanida joylashgan choyxonada bir guruh shaxslar qimor o‘ynayotgani ma’lum bo‘lgan.

Choyxonani ko‘zdan kechirish jarayonida qimor o‘yinlarida foydalaniladigan oshiq suyaklar, o‘yin kartalari, plastik idishlar, sochilgan holda yotgan 1800 dollar va 755 ming so‘m ashyoviy dalil sifatida rasmiylashtirib olingan.

Tadbir davomida qimor o‘yini tashkilotchisi, Chilonzor tumanida yashovchi, 1980 yilda tug‘ilgan muqaddam sudlangan shaxs qo‘lga olinib, u doimiy tarzda bu kabi o‘yinlarni tashkil qilib kelgani aniqlangan.

Qayd etilishicha, holat yuzasidan bu fuqaroga nisbatan Jinoyat kodeksining 278-moddasi (qimor va tavakkalchilikka asoslangan boshqa o‘yinlarni tashkil etish hamda o‘tkazish) bilan jinoyat ishi qo‘zg‘atilib, tergov harakatlari olib borildi.

2023 yilning oktyabr oyida jinoyat ishlari bo‘yicha Sergeli tuman sudi tomonidan mazkur fuqaro Jinoyat kodeksining 278-moddasi 1-qismi bilan aybdor deb topilgan. Unga 4 yil-u 11 oy muddatga ozodlikdan mahrum qilish jazosi tayinlangan.

#Sergeli tumani #qimor