Shols Yevropada gaz narxining oshishida Putinni aybladi

Jahon 20:23 / 09.12.2023 13652

Germaniya kansleri Olaf Shols Yevropada energiya narxining oshib ketishida Rossiya prezidenti Vladimir Putinni aybladi. Uning so‘zlariga ko‘ra, Germaniya hukumati Norvegiyadan ko‘proq gaz sotib olishga va suyultirilgan tabiiy gaz (STG) terminallarini yaratishga majbur va bu ancha qimmatga tushadi.

Shols o‘z bayonotini Germaniya Sotsial-demokratik partiyasi (SDP) qurultoyida aytdi. Unga ko‘ra, Rossiyadan gaz yetkazib berish to‘xtatilgach, Germaniya gaz ta’minotining yarmini yo‘qotgan, Yevropaga esa 120 milliard kub metr yoqilg‘i yetishmay qolgan.

«Rossiya Yevropaga energiya yetkazib berishni to‘xtatdi. Aynan Rossiya prezidenti gaz quvuri orqali gaz yetkazib berishni to‘xtatdi», dedi Shols.

Kansler, shuningdek, ta’minotning uzilishi energiya narxi bo‘yicha jiddiy oqibatlarga olib kelganini, jahon bozorida esa gaz narxi 10 barobar oshganini aytdi. Uning qayd etishicha, Germaniya hukumati vaziyatni to‘g‘irlash uchun keskin choralar ko‘rishga majbur bo‘lgan: Norvegiyadan ko‘proq gaz sotib olishga va mamlakat shimolida STG terminallarini qurishga qaror qilgan.

2022 yilda Yevropa Ittifoqida gaz iste’moli 343 milliard kub metrni tashkil etdi, shundan 95,7 milliardi uy xo‘jaliklari, qolgani esa sanoat tarmoqlari hisobiga to‘g‘ri keldi.

Ko‘proq yangiliklar: