Yengil atletika bo‘yicha O‘zbekiston terma jamoasi a’zosi Shohrux Davlatov marafon dasturida (42 km, 195 metr) Parij-2024 Olimpidasi yo‘llanmasiga ega chiqdi. Bu haqda Milliy olimpiya qo‘mitasi xabar qildi.

Bu O‘zbekiston delegatsiyasining Parij-2024 Olimpiadasiga qo‘lga kiritgan 15-yo‘llanmasi bo‘ldi.

Davlatov Ispaniyada o‘tgan Valencia Marathon Trinidad Alfonso turnirida 2:07:02 (2 soat, 7 daqiqa, 2 soniya) natija qayd etdi. Bu Parij-2024 Olimpiadasi uchun qo‘yilgan talabdan 1 daqiqa, 8 soniya yaxshiroq natija.

Shohruh ushbu ko‘rsatkich bilan 38 yil avval o‘rnatilgan milliy rekordni (2:13:28) ham yangiladi. Valensiyadagi musobaqada Davlatov umumiy hisobda 18-o‘rinni egallagan.

Ta’kidlanishicha, surxondaryolik atlet so‘nggi 2 yil ichida bir necha oy davomida Keniyada o‘quv-mashg‘ulot yig‘inlarida qatnashgan.