Xalqaro Olimpiya qo‘mitasi (XOQ) amalda ikkita, 2030 va 2034 yilgi qishki Olimpiada o‘yinlari mezbonlarini nomladi. Jumladan, 2030 yilgi o‘yinlar Fransiyaning Alp tog‘laridagi kurortlarida, 2034 yilgi o‘yinlar Qo‘shma Shtatlarning Solt-Leyk-Siti shahrida o‘tkaziladi.
So‘nggi o‘n yillikdan beri Olimpiada uchun mezbonni tanlash soddalashtirilgan sxema bo‘yicha amalga oshirilmoqda. Avvallari mezbon uzoq davom etadigan tanlov va ijro qo‘mitasi tomonidan yakuniy ovoz berish natijasida aniqlangan bo‘lsa, hozir maxsus komissiya tomonidan oldindan o‘tkaziladigan yagona ustuvor nomzodni tanlash asosida amalga oshirilmoqda.
Aynan shu jarayon natijasida Fransiya Alp tog‘lari kurortlari, shuningdek, Amerikaning Solt-Leyk-Siti shahri yagona nomzod sifatida qolgan. XOQ bo‘lajak Olimpiada o‘yinlari bo‘yicha komissiyasi rahbari Karl Stossning tushuntirishicha, endi musobaqalarni tashkil etish jarayoniga yordam berish maqsadida bu shaharlarning vakillari bilan maqsadli muzokaralar o‘tkaziladi.
Olimpiya o‘yinlari mezbonlarining yakuniy maqomi 2024 yil iyulida bo‘lib o‘tadigan XOQ sessiyasida Fransiyaning Alp tog‘lari kurortlari va Solt-Leyk-Siti shaharlariga beriladi. Solt-Leyk-Siti 2002 yilda ham qishki Olimpiada o‘yinlarini qabul qilgan.
Qayd qilinishicha, Solt-Leyk-Siti uchun tanlovda raqib bo‘lmadi. Fransiyada esa Shvetsiya va Shveytsariya bor edi. Karl Stoss so‘zlariga ko‘ra, Shveytsariya varianti 2038 yilgi Olimpiada uchun ustuvor nomzod bo‘ladi.
Fransiya Alp tog‘larida o‘tkaziladigan Olimpiya o‘yinlariga beshta kurort shahar mezbonlik qiladi. Ulardan to‘rttasi sportchilar va sayyohlar uchun ajoyib infratuzilmaga ega mashhur chang‘i kurortlari: Meribel, Kurshevel, Val-d’Izer va La-Klyuza. Janubdagi Nitssa shahrida esa hokkey, figurali uchish, konkida uchish va short-trek bo‘yicha musobaqalar o‘tkazish rejalashtirilmoqda. U ham tez-tez eng yaxshi xalqaro musobaqalarga, jumladan qishki sport turlariga mezbonlik qiladi va rivojlangan infratuzilmaga ega.
Qayd qilish joiz, Fransiya bundan oldin 3 marta (Shamoni-1924, Grenobl-1968, Albervill-1992) qishki Olimpiada o‘yinlariga mezbonlik qilgan. AQSh 4 marta (Leyk-Plesid-1932, Skvo-Velli-1960, Leyk-Plesid-1980, Solt-Leyk-Siti-2002) qishki o‘yinlarni qabul qilgan.
Eslatib o‘tamiz, navbatdagi qishki Olimpiada o‘yinlari 2026 yilda Italiyaning Milan va Kortina-d’Ampetsso shaharlarida o‘tkaziladi.
