The Washington Post: Isroil, HAMAS va AQSh sulh bo‘yicha «dastlabki» kelishuvga erishdi

Jahon 09:29 / 19.11.2023 13868

The Washington Post nashri xabar berishicha, Isroil va HAMAS AQSh vositachiligida G‘azo sektorida vaqtincha yarashish bo‘yicha «dastlabki» kelishuvga erishgan. Sulh shartlariga ko‘ra, harbiy harakatlarda besh kunlik tanaffus qilinadi, falastinliklar garovdagi o‘nlab kishilarni ozod etadi.

Olti sahifali hujjatda garovdagilarni ozod etish ishlari yaqin vaqtlar ichida boshlanishi ko‘zda tutilgan. Garovdagilardan «ellik nafar yoki undan ortiq qismi» har 24 soatda kichik guruhlarga bo‘lingan holda qo‘yib yuboriladi. Sulhga rioya etilishi «havodan turib nazorat qilinadi». Bu tanaffus insonparvarlik yordami hajmini jiddiy darajada ko‘paytirishga imkon beradi — jumladan Misrdan G‘azo sektoriga yetkazib beriladigan yonilg‘ini ham.

Isroilning Vashingtondagi mamlakat hukumati «garovga olinganlar bilan bog‘liq vaziyatning hech bir jihatini izohlamoqchi emasligi»ni bildirgan.

Bundan oldinroq HAMAS Qatar vositachiligidagi muzokaralarda bir necha kunlik sulh evaziga 50 nafar isroillik ayol va bolani ozod qilish taklifini bildirgani, Isroil tomoni bunga ko‘nmagani xabar qilingandi. Isroil tomoni garovga olingan oilalar bir-biridan ajralishi mumkin emas deb hisoblagan, ular bir oila vakillari birgalikda ozod etilishi va ko‘proq odam qo‘yib yuborilishini istamoqda.

  • HAMAS harakati a’zolari 7 oktyabr kuni Isroilga hujum qilib, 1200 dan ortiq kishini o‘ldirgan va 240 dan ortiq kishini garovga olgandi. Isroil mudofaa armiyasi bunga javoban G‘azo sektori bo‘ylab aviazarbalar berdi, keyin quruqlik amaliyotini boshladi. Falastin tomoni ma’lumotiga ko‘ra, sektorda 7 oktyabrdan buyon 11 mingdan ortiq kishi halok bo‘lgan.
Ko‘proq yangiliklar: