Zarautsoy darasidagi qoyatosh suratlari bundan 15 ming yil avval, miloddan avvalgi 12-7-ming yillarda toshlarga chizilgan. Dunyo miqyosida bunday tarixga ega suratlar juda noyob sanaladi. “Manzil” loyihasi bu gal tabiat va tarix uyg‘unlashgan maskan – Surxon davlat qo‘riqxonasiga sayohat qildi.

Surxon davlat qo‘riqxonasi 1986 yilda tashkil topgan. Qo‘riqxona Ko‘xitang tog‘ining sharqiy yonbag‘irlarida joylashgan bo‘lib, maydoni 23802 gektarni tashkil qiladi. Surxon davlat qo‘riqxonasi dengiz sathidan 850 metrdan 3137 metrgacha balandlikdagi hududni o‘z ichiga oladi. Eng yuqori nuqtasi Ayribobo cho‘qqisi bo‘lib, uning balandligi – 3137 metr.

Qo‘riqxonada hozirgacha umurtqali hayvonlardan 26 tur sut emizuvchilar, 137 tur qushlar, 24 tur sudralib yuruvchilar, 2 tur suvda va quruqlikda yashovchi, 5 tur baliqlar, jami 194 tur hayvonot dunyosi vakillari uchrashi aniqlangan. 25 tur hayvonot dunyosi vakillari O‘zbekiston Respublikasi Qizil kitobiga kiritilgan.

Bular orasida morxo‘r yoki burama shoxli echki asosiy ahamiyatga ega hayvonlardandir.