Украинада уруш бошланганидан кейин ўз ватанини тарк этган ва чет элдан Россия расмийларининг ҳаракатларини танқид қилган россияликлар учун «қайтиб келиш жуда қийин бўлади». Бу ҳақда Кремл матбуот котиби Дмитрий Песков 17 ноябр, жума куни талабаларнинг «МГИМО 360» YouTube-каналида маълум қилди. 

«Ҳамманинг битта ватани бор» ва у «душманлардан ташқари ҳамма учун доим очиқ», деди у интервю давомида. Уруш бошланганидан кейин Россияни тарк этган, Украина Қуролли кучлари учун пул йиғган, «турли ижтимоий-сиёсий тадбирларда нутқ сўзлаган ва мамлакатимизни (Россия) ҳақорат қилган» ҳар қандай одамнинг ватанига қайтишининг имкони бўлмайди, деб огоҳлантирди Песков.

«Мен улар учун амал қиладиган қонунлар ҳақида гапирмаяпман. Одамлар уларни қабул қилмайди», деб тушунтирди у.

Песков Россияни тарк этган ёшлар ҳақида 

Песковнинг қўшимча қилишича, ўз ватанида қолган россияликлар «саросимага тушган» ва қайтишни хоҳлаётганларни «қабул қилади». «Аммо, қўпол қилиб айтганда, ўз ватанига қарши оғиз очганлар учун биз билан бирга яшаётган одамларга ўзини тушунтириши жуда қийин бўлади. Бу улар учун катта муаммо бўлади», - дея таъкидлади Россия президенти Владимир Путиннинг матбуот котиби.

Шу билан бирга, у уруш бошланганидан кейин ёшларнинг катта қисми Россияни тарк этгани ҳақидаги баёнотга қўшилмаслигини билдирди. «Қанча йигитлар кўнгилли сифатида фронтга кетди. Қанча йигитлар турли бўлинмаларда. Қанча одам сафарбар қилинди ва ҳозир жанг қилмоқда. Ҳаммаси шу ерда қолди», - деди Песков.

2022 йил охирида The Bell онлайн-нашри 2022 йилнинг ўзида Россиянинг Украинага қарши уруши туфайли ярим миллионга яқин одам ўз ватанини тарк этгани ҳақидаги ҳисоб-китобни эълон қилди.

Шу билан бирга, Forbes  онлайн-нашри 2022 йил октябр ойида Россияда ўша йилнинг сентябр ойида «қисман сафарбарлик» эълон қилинганидан кейин уч ҳафта ичида 700 мингга яқин одам мамлакатни тарк этганини ёзган. «Кетганларнинг қанчаси сайёҳлар экани ва қайтишни режалаштираётгани номаълум», — дейилади маълумотда.