Марказий банк хабарига кўра, AVO bank учун бир қатор операцияларни амалга ошириш тақиқланди.
2023 йил 1 сентябрдан эътиборан банк устав капиталининг энг кам миқдори 200 млрд сўм бўлиши кераклиги белгиланган.
МБга кўра, бугунги кун ҳолатига AVO bank АЖ устав капитали 105 млрд сўмни ташкил этган ҳолда банк устав капитали миқдори қонунчилик талабларига мувофиқлаштирилмаган.
“Банклар ва банк фаолияти тўғрисидаги қонунчиликка мувофиқ, банк назорати қўмитаси қарорига асосан банкка нисбатан кредитлаш ва бошқа харажатларни молиялаштириш ҳамда депозит операцияларини амалга ошириш тақиқланди”, - дейилади расмий хабарда.
Аввалроқ, 5 та банк устав капиталини белгиланган миқдорга етказмагани хабар қилинганди. Қонунчилик талабига мувофиқ, банк устав капитали миқдори банк устав капиталининг энг кам миқдорига нисбатан белгиланган талабга мувофиқ эмаслиги қўпол қоидабузарлик ҳисобланади ва Марказий банк бундай ҳолда банк лицензиясини чақириб олишга ҳақли.
Июн ойида регулятор устав капиталига оид талабни 8 та банк бажармагани ва уларнинг лицензияси чақириб олиниши мумкинлигини хабар қилди. Аммо бу банкларнинг номлари очиқланмаган эди.
“Ўзгароэкспортбанк”нинг 100 фоиз давлат акциялар пакетини 5 млн долларга Support Level хорижий корхонаси сотиб олиб, банк устав капиталини қўшимча 29 млрд сўмдан кам бўлмаган қийматга ошириш мажбуриятини олганди. Банк хусусийлаштирилгач, унинг номи AVO bank этиб ўзгартирилган.
Support Level МЧЖнинг 100 фоиз улуши Олимжон Қосимович Шодиевга тегишли. Корхона 2015 йил 27 августда Тошкент шаҳрида рўйхатдан ўтган. Асосий фаолият тури – ходимлар билан ишлаш.
Олимжон Шодиев – Навоий кон-металлургия комбинати кузатув кенгашининг мустақил аъзоси, кенгаш раиси Жамшид Қўчқоровнинг ўринбосари ҳисобланади. Банк Support Level’га сотилган вақтда Халқаро Шодиев жамғармасининг Ўзбекистондаги ваколатхонаси “Ўзагроэкспортбанк” сотиб олинишига Фаттоҳ Шодиевнинг дахли йўқлиги маълум қилган.
Аввалига Россиянинг Совкомбанкига “Ўзагроэкспортбанк”даги 100 фоиз давлат улуши 4 млн долларга сотилиши керак эди, бироқ кейинчалик битим бекор қилинди. ОАВда банк тендерсиз ҳукумат ёпиқ қарори билан сотилаётгани ҳақида хабарлар тарқалгач, Давлат активларини бошқариш агентлиги “Ўзагроэкспорт” хусусийлаштирилгани ҳақида хабар берди.
