Qo‘qon va Chongju o‘rtasida birodarlashgan shaharlar to‘g‘risidagi memorandum imzolandi

Memorandum tomonlar o‘rtasida ta’lim, madaniyat, turizm, ijtimoiy-iqtisodiy va investitsiyalar sohasida o‘zaro manfaatli hamkorlikni o‘z ichiga oladi.

Foto: Dunyo

Amaliy tashrif bilan mamlakatda bo‘lgan Janubiy Koreyaning Chongju shahri munitsipaliteti sanoat va investitsiyalarni qo‘llab-quvvatlash departamenti boshlig‘i Xe Yon-xoy boshchiligidagi delegatsiya vakillari Qo‘qon shahri hokimi Ma’ruf Usmonov bilan uchrashdi.

Qo‘qon shahar hokimiyati axborot xizmati ma’lumotlariga ko‘ra, muloqot chog‘ida tomonlar Qo‘qon va Chongju shaharlari o‘rtasida savdo-iqtisodiy, ilmiy-texnikaviy, ishlab chiqarish, ta’lim va turizm sohalarida hamkorlikni yo‘lga qo‘yish masalalarini muhokama qildi.

Chongju shahri ma’muriyati vakillari Qo‘qon shahrining salohiyatlarini inobatga olgan holda ushbu hudud doirasida amalga oshiriladigan iqtisodiy-ijtimoiy sohalardagi loyihalarda ishtirok etishga qiziqishlari mavjud ekanligini bildirdi.

Uchrashuv yakunida Qo‘qon va Chongju shaharlari o‘rtasida birodarlashgan shaharlar to‘g‘risidagi memorandum imzolandi.

Mazkur memorandum tomonlar o‘rtasida ta’lim, madaniyat, turizm, ijtimoiy-iqtisodiy va investitsiyalar sohasida o‘zaro manfaatli hamkorlikni o‘z ichiga oladi.

#Qo‘qon #Chongju