Kanadada attraksion to‘xtab qoldi: odamlar 25 daqiqa oyog‘i osmondan bo‘lib, uning ishlashini kutdi

Kanadaning Ontario provinsiyasi Toronto shahridagi ko‘ngilochar park tashrif buyuruvchilari bilan bog‘liq noqulay vaziyat yuz berdi. 

Lumberjack attraksionida nosozlik sodir bo‘ldi. Undagi odamlar esa 25 daqiqa davomida oyog‘i osmondan bo‘lgan holda attraksionning ishlashini kutdi. 

Holat Canada’s Wonderland parkida 22 sentabr kuni mahalliy vaqt bilan 22:40 da sodir bo‘lgan. 23:05 da nosozlikka barham berilgan.

Park matbuot kotibi Greys Pikokka ko‘ra, odamlar attraksiondan xavfsiz tarzda olib tushilgan. Uning ta’kidlashicha, voqea ishtirokchilaridan 2 nafari ko‘kragidagi og‘riqdan shikoyat qilgan va ularga shu yerning o‘zida tibbiy yordam ko‘rsatilgan. 

«Mehmonlarimizning xavfsizligi bizning asosiy vazifamiz», — deydi Pikok.