Хитой ўтган ҳафта АҚШга ташрифи чоғида Американинг Fox News телеканалига берган интервюсида Хитой раҳбари Си Жинпингни диктатор деб атаган Германия ташқи ишлар вазири Анналена Бербокни кескин танқид қилди. 18 сентябр, душанба куни AFP хабарига кўра, Пекин Бербокнинг баёнотини «ўта бемаънилик, Хитойнинг сиёсий қадр-қимматини жиддий камситиш ва очиқ сиёсий провокация» деб атади. Хитой Ташқи ишлар вазирлиги «чуқур норозилик» билдирди ва дипломатик каналлар орқали протест йўллашини таъкидлади.

Бербокнинг Fox News телеканалига берган интервюсида, жумладан, Россиянинг Украинага бостириб кириши муҳокама қилинди. «Агар Путин бу урушда ғалаба қозонса, бу Хитой раҳбари Си каби дунёнинг бошқа диктаторларига ишора бўлмаса, бошқа нима бўлади? Шунинг учун Украина бу урушда ғалаба қозониши керак», деди Германия Ташқи ишлар вазирлиги раҳбари. 

Германия ҳукуматининг Хитой бўйича стратегияси 

Хитой Германиянинг энг йирик савдо шериги ҳисобланади. Жорий йилнинг июл ойида Германия ҳукумати биринчи марта Хитойга нисбатан стратегиясини эълон қилди. Ҳужжатда Берлин ўз қадриятлари ва манфаатларига путур етказмаган ҳолда Пекин билан иқтисодий ва сиёсий ҳамкорликни қандай кенгайтириш ниятида экани тасвирланган, деб таъкидлайди AFP. 

Хусусан, Германия ҳукумати муҳим соҳаларда Хитойга иқтисодий қарамликни камайтирмоқчи. Анналена Бербок стратегияни тақдим этар экан, барча фарқлар ва хавф-хатарларга қарамай, Хитой билан ҳамкорлик қилишга чақирди. «Биз Хитой билан ҳамкорлик қилмоқчимиз. Чунки бизга Хитой керак, лекин Хитойга ҳам Европа керак», - деб ёзди у X ижтимоий тармоғида.