Суд мажлислари 18-27 сентябр кунлари бўлиб ўтади. Биринчи куни Россия томони сўзга чиқади, 19 сентябрда Украинага сўз берилади, кейин суд ишда иштирок этиш учун ариза берган яна 30 дан ортиқ давлатни эшитади. Улар орасида Германия, Канада, Эстония ва Финландия бор. 

Украина 2022 йил 27 февралда, жанговар ҳаракатлар бошланганидан уч кун ўтиб, геноцид конвенциясини бузганлик учун даъво аризаси билан чиққан эди. 

Халқаро суд Бирлашган миллатлар ташкилотининг асосий суд органи ҳисобланади. У 1946 йилдан буён фаолият юритиб, давлатлар ўртасидаги ҳуқуқий низоларни халқаро ҳуқуқ меъёрлари асосида ҳал қилади. 

Суд қарори якуний ҳисобланади ва устидан шикоят қилиш мумкин эмас. Агар процессда иштирок этувчи давлатлардан бири талабни бажармаса, иккинчи томон БМТ Хавфсизлик Кенгашига мурожаат қилиши мумкин. 

Геноцид жиноятининг олдини олиш ва жазолаш тўғрисидаги конвенция БМТ Бош Ассамблеяси томонидан 1948 йилда қабул қилинган. Конвенцияда айтилишича, геноцид маълум бир миллий гуруҳ аъзоларини ўлдириш, уларга оғир тан жароҳати етказиш ва бошқалар шаклида ифодаланиши мумкин. Геноцидни содир этган шахслар, шу жумладан геноцидда қатнашган, ундаган ва содир этишга уринган шериклар жазоланади.