Yevrokomissiya Ukraina g‘allasini import qilish bo‘yicha taqiqni uzaytirmadi

Jahon 09:03 / 16.09.2023 4923

Yevropa komissiyasi 15 sentabr, juma kuni tegishli chora-tadbirlar muddati tugagandan so‘ng, Ukrainadan qishloq xo‘jaligi mahsulotlari importiga cheklovlarni uzaytirmadi. Bu haqda Yevrokomissiya saytida xabar berildi.

YeK maxsus muvofiqlashtirish platformasi ishi va joriy yil may oyida joriy etilgan vaqtinchalik chora-tadbirlar tufayli Ukraina g‘allasining besh qo‘shni davlat bozoriga ta’siri yo‘qolganini va Yevropa Ittifoqidan tashqari uchinchi mamlakatlarga eksportni yo‘lga qo‘yish mumkinligini ta’kidladi. 

Ukraina, shuningdek, qo‘shni mamlakatlarda narxlar oshishiga yo‘l qo‘ymaslik uchun 30 kun ichida eksportni litsenziyalash tizimi kabi qo‘shimcha chora-tadbirlarni joriy etishga rozi bo‘ldi. Bundan tashqari, Kiyev to‘rt toifadagi tovarlar eksportini alohida nazorat qilishi kerak. «Yevropa komissiyasi Ukraina tomonidan samarali choralar ko‘rilayotgan ekan, har qanday cheklovlarni joriy qilishdan tiyiladi», deya ma’lum qildi Bryussel. 

Ukrainaga qo‘shni davlatlar embargo muddatini uzaytirish tarafdori 

Rossiya harbiy harakatlari va keyinchalik Qora dengizning harbiy blokadasi tufayli Ukraina qishloq xo‘jaligi mahsulotlarini dengiz orqali eksport qilish cheklandi. Natijada quruqlik orqali katta hajmlar olib o‘tildi. Ukraina bilan chegaradosh Bolgariya, Vengriya, Polsha, Ruminiya va Slovakiyada bu ortiqcha mahsulot yig‘ilib qolishi hamda tovarlar narxining pasayishiga olib keldi. Beshta davlat Ukrainadan g‘alla va boshqa qishloq xo‘jaligi mahsulotlarini olib kirishni vaqtincha taqiqladi. 

Keyinchalik, Yevropa komissiyasi Ukrainadan bug‘doy, makkajo‘xori, kungaboqar urug‘ini 5 iyungacha, keyin esa 15 sentabrgacha yetkazib berishga embargo qo‘yishga rozi bo‘lgach, ular bu choralarni bekor qildi. Endi bu embargo bekor bo‘ldi. 

Polsha Ukraina qishloq xo‘jaligi mahsulotlari importi bo‘yicha o‘z taqiqini joriy qiladi 

Varshava bir necha bor Yevropa Ittifoqi darajasidagi cheklovlarni olib tashlashga qarshi chiqdi va bu holatda o‘z embargosini joriy etishi bilan tahdid qildi. Ukraina Yevropa Ittifoqidan Polsha va boshqa Sharqiy Yevropa davlatlari orqali quruqlikda g‘alla eksport qilish imkonini beruvchi «birdamlik yo‘laklari»ni ochiq saqlashni so‘radi. Fransiya, Germaniya va Ispaniya Kiyevning pozitsiyasini qo‘llab-quvvatlab, savdo cheklovlari YeI ichki bozori yaxlitligi va Yevropaning Ukrainani qo‘llab-quvvatlashga qaratilgan sa’y-harakatlariga putur yetkazadi, deya ma’lum qildi. 

Bosh vazir Mateush Moravetskiy Yevropa komissiyasining qaroridan saylovchilar bilan uchrashuv chog‘ida xabar topdi va Varshava o‘z taqiqini joriy etishini tasdiqladi. «Men ular (Yevropa komissiyasi) taqiqni uzaytirishini xohlardim, lekin ular buni qilmadi. Bilasizmi, biz hozir nima qilamiz? Biz ularning kelishmovchiligiga qaramay, Yevropaning roziligi yo‘qligiga qaramay, bu taqiqni uzaytiramiz. Ukraina g‘allasini olib kirishga qo‘yilgan taqiqni uzaytiramiz. Berlin, fon der Lyayyen, Tusk yoki Veberning gaplariga quloq solmaymiz, chunki bu polshalik fermerning manfaatlariga mos keladi», — dedi Polsha hukumati rahbari. 

Vengriya ham xuddi shunday taqiqni joriy qildi, deb xabar beradi AFP. 

Ko‘proq yangiliklar: