Ukrainada Kolomoyskiyga uchinchi ayblov qo‘yildi

Jamiyat 10:24 / 16.09.2023 16068

Ukrainalik tadbirkor Igor Kolomoyskiyga yangi, uchinchi ayblov e’lon qilindi - u 5,8 milliard grivnani «o‘zlashtirganlikda» ayblanmoqda. Bu haqda Ukraina Xavfsizlik xizmati («SBU») 15 sentabr, juma kuni e’lon qilgan xabarda aytiladi.

Ma’lumotga ko‘ra, Kolomoyskiy, tergovchilar fikriga ko‘ra, 2013 yildan 2014 yilgacha o‘ziga tegishli bo‘lgan «Privatbank» xodimlari orasidan jinoiy guruh tuzgan, ular orqali soxta pul omonatlari tizimli ravishda bank kassasiga o‘tkazilgan, ammo aslida hech qanday mablag‘ olinmagan. 

Ushbu sxema, «SBU»ning ta’kidlashicha, Kolomoyskiyga o‘z hisoblariga 5,8 milliard naqd bo‘lmagan grivnani olish imkonini berdi (o‘sha davrdagi kurs bo‘yicha, taxminan 700 million dollar). Kolomoyskiy, tergov ma’lumotlariga ko‘ra, hisobvaraqlardagi mablag‘larni o‘z nazorati ostidagi korxonalardan kreditlar berish, kreditlarni qaytarish uchun ishlatgan, shuningdek ularni chet elga o‘tkazgan, naqd pulga aylantirgan va bank filiallarida yechib olgan. 

Kolomoyskiyga qarshi boshqa ayblovlar

Sentyabr oyi boshida Ukraina sudi Kolomoyskiyni 509 million grivna miqdorida garov puli evaziga ozodlikka chiqarish imkoni taqdim etilgan holda hibsga oldi. «SBU» tadbirkor firibgarlikda va jinoiy yo‘l bilan qo‘lga kiritilgan mulkni qonuniylashtirishda gumon qilinayotgani haqida xabar berdi. Tergov ma’lumotlariga ko‘ra, 2013 yildan 2020 yilgacha Kolomoyskiy nazorati ostidagi bank tuzilmalari orqali xorijga 0,5 milliard grivnadan (14 million dollar) ko‘proq pul o‘tkazgan.

Hibsga olinganidan bir necha kun o‘tgach, Kolomoyskiyga ikkinchi ayblov qo‘yildi - «Privatbank» mablag‘laridan 9,2 milliard grivnani «egallab olish».

Forbes Kolomoyskiyning boyligini 1 milliard dollarga baholagan. «Privatbank»dan tashqari, «Ukrtatnafta» neftni qayta ishlash kompaniyasi va «Ukrnafta» neft-gaz kompaniyasi ham uning aktivi edi - ular ham milliylashtirildi. 2014-2015 yillarda Kolomoyskiy Ukrainaning Dnepropetrovsk viloyati gubernatori lavozimida ishlagan.

Ko‘proq yangiliklar: