Lukashenko Putinga KXDR bilan «uch davlat hamkorligi»ni taklif qildi

Jahon 08:15 / 16.09.2023 11192

Rossiya prezidenti Vladimir Putin va Belarus rahbari Aleksandr Lukashenko 15 sentabr, juma kuni Sochida bo‘lib o‘tgan uchrashuvda Ukrainadagi urush, iqtisodiy hamkorlik va bir kun avval Shimoliy Koreya yetakchisi Kim Chen In bilan muzokaralarni muhokama qildi.

Ushbu uchrashuv Ukraina urushi fonida bo‘lib o‘tdi, uning davomida, BMT ma’lumotlariga ko‘ra, 9,6 mingdan ortiq tinch aholi halok bo‘lgan va 17,5 mingdan ortiq odam yaralangan; 16 milliondan ortiq ukrainaliklar o‘z uylarini tark etishga majbur bo‘ldi, ulardan 6 millionga yaqini boshqa mamlakatlarga chiqib ketdi. 

Lukashenko Putinga: «Sizni Kim Chen In bilan ko‘rganimdan xursand bo‘ldim» 

«Siz va Kim Chen Inni Vostochniy kosmodromida ko‘rish juda yoqimli bo‘ldi. O‘ylaymanki, biz uch davlat – Shimoliy Koreya, Rossiya o‘rtasidagi hamkorlik haqida o‘ylashimiz mumkin», — dedi Lukashenko Putin bilan uchrashuvda. Kreml rahbari, o‘z navbatida, Lukashenkoga Shimoliy Koreya yetakchisi bilan muzokaralar haqida ma’lumot berdi hamda Rossiya va KXDR «hech kimga tahdid solmasligini» ta’kidladi. Putinning so‘zlariga ko‘ra, Rossiya KXDR bilan munosabatlarni o‘rnatishda hech qanday xalqaro me’yor va kelishuvlarni «hech qachon buzmaydi va buzish niyatida ham emas». 

G‘arb ekspertlarining fikricha, Putin va Kim Chen In harbiy hamkorlik, xususan, Ukrainadagi urushni davom ettirish uchun Shimoliy Koreya qurol-yarog‘i va o‘q-dorilarini Rossiyaga yetkazib berish masalalarini muhokama qilgan. Agar bunday yetkazib berish boshlansa, bu «xalqaro huquqning ochiqdan ochiq buzilishi bo‘ladi», dedi avvalroq Stokholm tinchlik tadqiqot instituti eksperti Saymon Vezeman. O‘z navbatida, Qo‘shma Shtatlar Shimoliy Koreya qurol-yarog‘ yetkazib bergani uchun «yuqori narx to‘lashi» bilan tahdid qildi. 

Putin 300 ming yangi askar haqida gapirdi 

Putin Lukashenkoga Ukrainaga qarshi urushga rossiyalik askarlarni yollashdagi muvaffaqiyat haqida gapirib berdi. Uning so‘zlariga ko‘ra, 300 mingga yaqin kishi Rossiya Mudofaa vazirligi bilan shartnoma imzolagan yoki ko‘ngilli bo‘lgan. Putin, shuningdek, bir necha kun oldin e’lon qilgan 270 ming askar haqidagi ma’lumotlar «allaqachon eskirganini» ta’kidladi. 

Lukashenko, o‘z navbatida, Putinga Ukrainada «o‘z muntazam harbiy qismlarini ko‘rishni xohlaydigan» G‘arb davlatlari haqida gapirdi. Belarus yetakchisining so‘zlariga ko‘ra, Polshada chegara yaqinida allaqachon Ukrainaga kirishga tayyor bo‘lgan harbiy qismlar tuzilgan. 

Bunga Putin: «biz (Ukrainada) ham jang maydonida, ham mashg‘ulotlar olib boriladigan bo‘linmalarda xorijlik yollanma askarlarni, chet ellik instruktorlarni aniqlayapmiz», dedi. Shu bilan birga, Rossiya, uning so‘zlariga ko‘ra, «harbiy harakatlarga tashqaridan odamlarni taklif qilishga bunday ehtiyojga ega emas». 

Lukashenko Rossiya va Belarus iqtisodiyoti sanksiyalardan oldingi darajaga chiqishini kutmoqda 

Belarus va Rossiyaning integratsiya jarayonlari haqida gapirar ekan, Lukashenko ushbu sohadagi «vazifaning 80 foizdan ortig‘i bajarilgan» deb hisoblaydi. U «uch oy ichida» hukumatlarning 2021-2023 yillarga mo‘ljallangan ittifoq davlatini yaratish to‘g‘risidagi shartnoma qoidalarini va 28 ta ittifoq dasturini amalga oshirishning asosiy yo‘nalishlari bo‘yicha «savollarni tugatishga» va’da berdi. 

Lukashenko Putinga «Rossiya hukumatining iltimosiga binoan» Rossiyaga «nafaqat uzilishlar, balki yonilg‘i bozoridagi ayrim qiyinchiliklarni» hal qilish uchun 60 ming tonna benzin va dizel yetkazib berilishi haqida ma’lum qildi. 

Belarus rahbariga ko‘ra, 2024 yilda har ikki davlat iqtisodiyoti sanksiyadan oldingi darajaga chiqadi.Uning so‘zlariga ko‘ra, Putin bilan birgalikda «katta va kichik barcha masalalarni hal qiladi». «Mufassal ravishda, Ukraina mojarosi bilan bog‘liq harbiy-sanoat kompleksidan tortib, barcha masalalar - amalda hal qilingan. Agar biror narsa qolsa, biz qaysi yo‘nalishda harakat qilishimiz kerakligini bilamiz», - dedi Lukashenko. 

Ko‘proq yangiliklar: