Latviya Seymi 15 sentabr, juma kuni liberal-konservativ «Yangi birlik» partiyasidan bosh vazir Evika Silinya boshchiligidagi respublikaning yangi hukumatini tasdiqladi. 48 yoshli huquqshunos boshchiligidagi vazirlar mahkamasini 100 deputatdan 53 nafari qo‘llab-quvvatlagan, 39 nafar deputat esa qarshi ovoz bergan. Hukumatning yangi koalitsiyasiga «Yangi birlik»dan tashqari «Yashillar va dehqonlar ittifoqi» hamda so‘l-markazchi «Progressiv» partiyasi ham kirdi.

Parlamentda so‘zga chiqqan Evika Silinya, xususan, Latviyaning mudofaa budjetini oshirish va Ukrainani qo‘llab-quvvatlashda davom etishni va’da qildi. «Mudofaa budjetini oshiramiz va qurolli kuchlarimizni kuchaytiramiz. Biz Ukrainani qo‘llab-quvvatlaymiz», - dedi u.

Ilgari Silinya Latviya farovonlik vaziri lavozimida ishlagan. Bosh vazir sifatida u avgust oyi o‘rtalarida hukumat tarqab ketganidan keyin iste’foga chiqishini e’lon qilgan partiyadoshi Krishyanis Karinshni almashtiradi. Karinsh o‘zining koalitsiyadagi hamkorlari - «Qo‘shma ro‘yxat» va «Milliy birlashuv»ni «farovonlik va iqtisodiy o‘sishni ta’minlash bo‘yicha ishlarga to‘sqinlik qilishda» aybladi. Yangi hukumatda Karinsh tashqi ishlar vaziri lavozimini egallaydi.