«O‘zbekiston – 2030» strategiyasida mamlakatda kambag‘allik darajasini keskin qisqartirish masalasi bo‘yicha alohida chora-tadbirlar belgilandi.

2023 yilning so‘nggiga qadar Kambag‘allikni qisqartirish va bandlik vazirligi xitoylik mutaxassislar va xalqaro tashkilotlar bilan birgalikda 2024-2030 yillarga mo‘ljallangan kambag‘allikni qisqartish bo‘yicha strategiyani ishlab chiqadi.

2026 yilga qadar kambag‘allik 2 barobarga, 2030 yilga qadar esa keskin qisqartiriladi. Kambag‘allikka tushish xavfi mavjud 4,5 million aholi daromadini oshiriladi.

Mehnat qobiliyatini ishga solish orqali 3 million nafar yoshlar kambag‘allikdan chiqariladi. Ijtimoiy sheriklik asosida 500 ming malakali mutaxassis tayyorlash yo‘lga qo‘yiladi va bunga har yili kamida 1 milliard dollar yo‘naltiriladi.

Har bir viloyatda kambag‘allik darajasi yuqori bo‘lgan bittadan jami 14 ta tumanni kambag‘allikdan chiqarish va kompleks rivojlantirish bo‘yicha dastur ishlab chiqilib, tasdiqlanadi.

Tanlab olingan 14 ta tumanni Xitoy tajribasi asosida, shu jumladan yangi yondashuvlar, innovatsion va «yashil» texnologiyalar hamda boshqaruvning zamonaviy usullarini qo‘llagan holda kambag‘allikdan chiqarish usullari amaliyotga joriy etiladi.

Yangi moliyaviy  instrumentlar joriy etish orqali kambag‘al aholining moliyaviy resurslardan foydalanish imkoniyatlari kengaytirilib, imtiyozli kredit va subsidiyalar berish tizimi takomillashtiriladi.

Ehtiyojmand aholining tadbirkorlik tashabbuslarini yanada qulay shartlarda qo‘llab-quvvatlash maqsadida raqamli «Mikromoliya» tashkiloti tashkil etiladi.