9 avgust kuni tushdan so‘ng Surxondaryo viloyati Termiz tumanida «Farg‘ona azot» AJga qarashli omborxonalardan birida yong‘in chiqdi. FVV bu bo‘yicha tuman boshqarmasiga xabar kelib tushganini ma’lum qildi.

Yong‘in oqibatida taxminan 70−80 kvadrat metr maydonda omborxonaning ichida bo‘lgan ko‘mir yonib zararlangan. Uni o‘chirishga 5 ta yong‘in-qutqaruv ekipaji jalb qilingan. O‘t o‘chiruvchilar soat 14:10 da voqea joyiga yetib borib, 5 daqiqada yong‘inni qurshab oldi. Uni o‘chirishga 1 soatdan ortiq vaqt ketdi.

Hodisa oqibatida tan jarohati olgan va halok bo‘lganlar to‘g‘risida ma’lumot kelib tushmagan.

Yong‘in sababi va moddiy zarar miqdori aniqlanmoqda.

«O‘zkimyosanoat» matbuot xizmati hodisa yuzasidan bayonot berdi. Unga ko‘ra, yong‘in vaqtida omborda mineral o‘g‘itlar bo‘lmagan.

«Dastlabki ma’lumotlarga ko‘ra, «Farg‘onaazot» AJ omborining 6 ta boksida yong‘in sodir bo‘lgan. Yong‘in paytida omborda ko‘mir mahsuloti bo‘lgan. Hozirda, mazkur holat va yong‘inning kelib chiqish sabablariga aniqlik kiritilmoqda. Batafsil ma’lumotlar taqdim etiladi», deyilgan xabarda.