Zulhijja oyi kirib keldi. Qurbon hayiti 28 iyunga to‘g‘ri keladi

19 iyun, dushanba kuni Zulhijja oyining birinchi kunidir, deya ma’lum qildi O‘zbekiston Musulmonlar idorasi. Shunga ko‘ra, bu oyning 10-sanasidan boshlanadigan Qurbon hayiti bayrami milodiy 28 iyun, chorshanbaga to‘g‘ri kelmoqda. O‘zbekistonliklar ketma-ket bir necha kun dam oladi.

Foto: Kun.uz

Yangi oy ko‘rinishi bilan, hijriy-qamariy taqvim bo‘yicha oxirgi oy – Zulhijja oyi boshlandi. Bu oyning birinchi kuni 19 iyun, dushanba kuniga to‘g‘ri kelmoqda. Bu haqda O‘zbekiston Musulmonlar idorasi ma’lum qildi.

Zulhijja oyi (“Haj egasi” degan ma’noni anglatadi) – Haj ibodati ado etiladigan, qurbonlik qilinadigan, Arafa va Qurbon hayiti nishonlanadigan oy.

Qurbon hayiti Zulhijjaning 10-sanasidan boshlab nishonlanadi. Bu joriy yilgi milodiy taqvim bo‘yicha 28 iyun, chorshanbaga to‘g‘ri kelmoqda.

Eslatib o‘tamiz, 2023 yildagi qo‘shimcha dam olish kunlari bo‘yicha prezident farmonida 30 iyun (juma) barcha uchun, 1 iyul (shanba) esa olti kunlik ish haftasida ishlaydiganlar uchun qo‘shimcha dam olish kuni deb belgilangan. Bunda, Qurbon hayiti 29 iyunga to‘g‘ri kelishi taxmin qilingan.

Lex.uz saytidagi ma’lumotga ko‘ra, ayni paytda farmonga o‘zgartirish kiritilmoqda.

Hayit kunlarida qurbonlik so‘yish kimlar uchun vojib? Qurbonlikka oid hukmlar

#Qurbon hayiti