12 iyun kuni «Toshkent —  Samarqand» yo‘nalishi bo‘yicha parvoz qilgan Silk Avia kompaniyasi samolyoti sahnida yo‘lovchi sigareta chekkani aniqlandi. 

Qayd qilinishicha, 70 yoshli ayol samolyot hojatxonasida sigaret chekkan. Tamaki mahsuloti hidini sezgan bort kuzatuvchilari yo‘lovchiga samolyot bortida chekish qat’iyan taqiqlanganini tushuntirishga harakat qilishgan. Bunga javoban ayol o‘z noroziligini bildirgan. 

Bort kuzatuvchilari vaziyat haqida samolyot komandiriga xabar bergan. Samolyot Samarqandga qo‘ngach, huquq-tartibot xodimlari tomonidan yo‘lovchiga nisbatan ma’muriy bayonnoma tuzilgan. Endi u bazaviy hisoblash miqdorining 2 baravari (660 ming so‘m) miqdorida jarimaga tortilishi mumkin. 

O‘zbekiston qonunchiligiga ko‘ra, samolyot bortida chekish qat’iyan man etiladi. Bu Ma’muriy javobgarlik to‘g‘risidagi kodeksining 122-moddasi 2-qismi bilan tartibga solingan.