Turk lirasi yangi moliya vaziri tayinlanganidan keyin yana qadrsizlandi

Jahon 14:59 / 05.06.2023 8460

Turk lirasining kursi 5 iyun kuni Toshkent vaqti bilan soat 13:54 holatiga ko‘ra 1,15 foizga pasayib, bir dollar uchun 21,17 lirani tashkil qildi. Bu bir dollar uchun 21,8 liraga teng bo‘lgan o‘tgan haftadagi rekord darajaga yaqin, deb yozadi Reuters. 

Lira yangi moliya vaziri tayinlanishiga qaramay, pasayishda davom etyapti. Turkiya prezidenti Rajab Toyyib Erdo‘g‘an 3 iyun kuni Mehmet Shimshekni G‘aznachilik va moliya vazirligiga rahbar etib tayinladi. Ilgari u Merrill Lynch kompaniyasining London bo‘limida, so‘ngra moliya vaziri, Turkiya bosh vaziri o‘rinbosari lavozimlarida ishlagan. 2018 yilda Erdo‘g‘an kuyovi Berat Albayrakni Moliya vazirligi rahbari etib tayinlaganidan so‘ng u hukumatni tark etgan edi. 

Shimshekning tayinlanishi Erdo‘g‘an mamlakatning iqtisodiy siyosatini o‘zgartirishga tayyor ekanligini ko‘rsatishi mumkin. Yangi vazir an’anaviy pul-kredit siyosatiga qaytishni, jumladan, asosiy stavkani oshirishni yoqlaydi, deb yozadi Financial Times. Bloomberg manbalariga ko‘ra, Shimshek Erdo‘g‘an bilan qayta saylanganidan so‘ng o‘tkazgan uchrashuvda qaytishi sharti sifatida mustaqil pul-kredit siyosati olib borish imkoniyatini ilgari surgan. 

Shishmekning o‘zi 4 iyun kuni Turkiya iqtisodiyoti «oqilona asosga qaytishdan boshqa chorasi yo‘qligini» aytdi. «Oshkoralik, izchillik, taxmin qila olish va xalqaro me’yorlarga rioya qilish bizning asosiy tamoyillarimiz bo‘ladi», deb va’da berdi u. 

 

Ko‘proq yangiliklar: