Qashqadaryoda bitta sayt va besh nafar bloger faoliyatini tugatganini ma’lum qildi

O‘zbekiston 22:47 / 05.06.2023 28927

5 iyun kuni asosan Qashqadaryoda faoliyat yurituvchi Nasafnews.uz internet-nashri o‘z faoliyatini yakunlayotganini e’lon qildi. Shu bilan birga, nashr rahbari Umid Karimov ham Telegram'dagi «Kapitan Karimov» blogini ortiq yuritmasligini ma’lum qildi.

«Buning sabablari haqida to‘xtalib o‘tmoqchimasman. Bizni qo‘llab-quvvatlagan, ishonch bildirgan hammaga rahmat», deyiladi Nasafnews.uz saytining Telegram-kanalida e’lon qilingan xabarda.

Mazkur yangilik ortidan yana to‘rt nafar bloger – Maqsud Muzaffarov, Otabek Artikov, Azizbek Yazdurdiyev, O‘roljon Kamolov (Turon24/7 telegram-kanali muallifi), shuningdek, KeshNews Telegram-kanali ham faoliyatini to‘xtatayotganini bildirgan.

Ular bu qarorga birgalikda kelishganmi yoki yo‘q, bu ma’lum emas. Maqsud Muzaffarov o‘z qarorini «ota-onasining xohish-istagi hamma narsadan muhim»ligi bilan izohlagan. Umid Karimov esa ichki kechinmalarini video orqali ifodalashga uringan.

Blogerlarning aytishicha, faoliyatlarini to‘xtatishga undagan qaror yaqinda bo‘lib o‘tgan sud va tayinlangan jazo bilan bog‘liq. 29 may kuni Umid Karimov va Maqsud Muzaffarov Ma’muriy javobgarlik to‘g‘risidagi kodeksning turli moddalari bo‘yicha huquqbuzarlik sodir etgan deb topilib, 5 sutkaga qamalgandi.

Blogerlar Shahrisabz tumani IIB YHXB IIB xodimlariga nisbatan qo‘pollik qilib, janjal ko‘targanlikda va fuqarolar oldida IIB xodimlarini obro‘sizlantirganlikda, jamiyatda yurish-turish qoidalarini qasddan mensimasdan, baqir-chaqir qilib, mayda bezorilik qilganlikda ayblangan.

Avtobloger Maqsud Muzaffarov o‘zining Telegram-kanalida Umid Karimovni ichki ishlar xodimlari IIBga olib kirib ketgani, bunga blogerning xodim «to‘xtab turgan mashina»ni tekshirayotganiga bildirgan e’tirozi sabab bo‘lgani, ularni tekshirgan xodim Shahrisabz IIB boshlig‘i o‘rinbosari bo‘lgani haqida xabar bergan. Keyinchalik Otabek Artikov mazkur holatlarni ommaga ochiqlagan avtobloger ham ushlanib, sudga olib ketilgan, deya ma’lum qilgan.

Blogerlar Kun.uz bilan suhbatda sudda adolat qaror topishiga umid qilishgani, biroq sudya ularga quloq ham solmaganidan shikoyat qildi.

«Sudga ishonch yo‘qligini ko‘rib, ortga qaytmasam bo‘lmas ekan dedim, – deydi Maqsud Muzaffarov. –  Ishonganim sud edi. IIB nimadir uyushtirsa ham sud meni eshitadi deb o‘ylardim va sudga ishonib qo‘rqmasdan yurardim. Ammo sudda buning aksini ko‘rib taqdirga tan berdim. Ikkita “GAI”ning tuhmati bilan 5 sutkaga qamalib ketdik. Bizni IIB xodimlariga qo‘pol munosabatda bo‘lish, ularni obro‘sizlantirishda ayblashdi. Holbuki, bunday qilmagandik. Qonunlar bizni na fuqaro, na bloger sifatida himoya qilarkan, bunday sharoitda blogerlikni davom ettirishdan hech qanday ma’no yo‘q».

«Sudda YHXB xodimlari ularga qo‘pollik qilganimiz, janjal ko‘targanimiz, mayda bezorilik qilganimiz aks etgan holatning bodikameraga yozib olingan tasvirini ko‘rsatishini qayta-qayta iltimos qildim. Chunki ushbu tasvirlar taqdim etilganda mening aybsiz ekanim ro‘yirost isbotini topardi. Biroq bu iltimosimiz qanoatlantirilmadi, – deydi Umid Karimov.

Men yo‘l chetidagi turgan mashinani tekshirayotgan IIB xodimlariga «To‘xtab turgan mashina-ku» deb gapirganman xolos. Shu so‘zlarim tufayli meni ushlab olib ketishdi. Sudda menga advokat berishlarini yoki tanish advokatimga xabar berishimga imkon so‘radim. Biroq sudya bu talabimni ham qanoatlantirmadi. IIB xodimini urmadim, so‘kmadim. Ammo 5 sutkaga qamaldim. Sudda mening so‘zlarim hech qanday tosh bosmadi. IIB xodimlarining hech bir isbot-dalilsiz ko‘rsatmasiga tayanib, menga jazo berildi. Sud tomonidan tayinlangan jazoni o‘tab chiqqach, faoliyatimni tugatishga qaror qildim».

Blogerlar Kun.uz bilan suhbatda bu hech qanday piar emasligi, o‘zlari va yaqinlarining kelajagidan xavotirlanib, blogerlik bilan shug‘ullanishni to‘xtatishayotganini aytishdi.

Maqsud Muzaffarov va Umid Karimov boshqa blogerlik qilmasligi haqida xabar berganidan so‘ng boshqa yana bir qancha blogerlar ham ular bilan hamfikr ekanliklarini namoyon qilib, faoliyatlarini davom ettirmasliklari haqida yozishdi.

“5 sutkaga qamalganlar – yaqin do‘stlarim. Ularni bir kun ichida “o‘xshamagan” sabablar bilan qo‘lga olib, ishi shu kunning o‘zida sudda ko‘rilib, 5 sutkadan berilishi so‘z erkinligi bo‘g‘ilishining alomati sifatida qabul qildim. Avvalroq anonim profillardan meni ham ta’qib qilishgan, “o‘zbekka do‘st emassan” deyishgan edi, bu haqda kanalimda ham yozgandim. Ertaga mening sog‘-omon yurishimga kim kafolat beradi? Agar men bilan shunday holat yuz berganda, onam buni ko‘tarolmasdi, onamning qotiliga aylanishni istamayman. Shu sababli boshqa blogerlik qilmoqchi emasman. Buyog‘iga oddiy odamlar qatorida yashamoqchiman”, deydi Azizbek Yazdurdiyev.

“Ma’muriy qamoq jazosi berilganlar orasida yo‘q edim. Ammo sudda ularga qilingan nohaqlikdan keyin o‘zimni xavf ostida his qildim. Sudlar fuqarolarning hayotiga daxldor masalalarda bu darajada ko‘r-ko‘rona ish ko‘radigan jamiyatda olov bilan o‘ynashib bir baloga yo‘liqishim aniq. Shu uchun vaqtida to‘xtashni ma’qul ko‘rdim. Qachondir blogerlikka qaytish haqida umuman o‘ylamayapman. Sokin hayotdan bahra olmoqchiman. Hadikda yashagim yo‘q”, deydi Otabek Artikov.

“Anchadan beri xorijga ketish haqida o‘ylab yurgandim, shuning uchun ko‘chdim. Kanalimizni jamoaning qolgan a’zolari yuritishini o‘ylab turgandik, biroq bir nechta blogerning hech qanday dalilsiz, IIB xodimlarining og‘zaki ko‘rsatmasi bilangina qamalgani, bu ishlar biz bilan ham sodir bo‘lishi ehtimoldan xoli bo‘lmagani uchun jamoani xavfga qo‘yishni istamadim.

Men uzoqda bo‘lganim uchun bloger do‘stlarimning hammasi bilan gaplasholmadim. Biroq aksarining daromad manbayi boshqa bo‘lib, blogerlik hobbi bo‘lgani holda bu qarorga kelganini hurmat qilishlari kerakligini istardim. Qolaversa, Maqsud Muzaffarov asosan sudlardagi adolat tufayli o‘z faoliyatini davom ettirib kelayotgan edi, ya’ni YHXB xodimlari qo‘ygan nohaq jarimalarni sudda isbotlagan holda faoliyat olib borgan. Hech bir isbotsiz qamalishi, kamida otasini ham holatga aralashtirishlari qattiq ta’sir etgan bo‘lishi ehtimol”, deydi O‘roljon Kamolov

Ko‘proq yangiliklar: