«PSJ» Messi jamoani tark etayotganini e’lon qildi. Klub va futbolchi o‘zaro minnatdorchilik bildirishdi

Fransiyaning «PSJ» klubi Lionel Messi jamoani tark etayotganini rasman e’lon qildi.

Foto: Getty images

«Lionel Messining «PSJ»dagi ikki yillik faoliyatidan keyin futbolchi 2022/23 yilgi mavsum yakunida klubni tark etishini ma’lum qilamiz.

Klub Leoga keyingi faoliyati davomida omad va zafarlar yor bo‘lishini tilab qoladi. «Pari Sen-Jyermen» jamoa safida ikki marta Fransiya chempioni va kubogi sohibi bo‘lgan «Oltin to‘p»ning 7 karra sohibiga chin qalbdan minnatdorchilik bildiradi», - deyiladi klub xabarida.

O‘z o‘rnida 35 yoshli argentinalik futbolchi ham Parij klubini tark etayotgani haqida gapirib, «PSJ»ga minnatdorchilik bildirdi.

«Klubga, Parij va uning muxlislariga o‘tgan 2 yil uchun rahmat! Keyingi ishlaringizga omad tilab qolaman», - deydi Messi.

Messi faoliyatini qayerda davom ettirishi bo‘yicha masalani cho‘zmoqchi emas. U bugun «PSJ» tarkibidagi so‘nggi uchrashuvini o‘tkazadi.

Avvalroq, «Al-Hilol» Messiga yillik 400 million yevro maosh taklif qilayotgani haqida xabarlar tarqalgandi.

Ma’lumot uchun, Lionel joriy mavsum Fransiya chempionatidagi 31 o‘yinda 16ta gol va shuncha assistga mualliflik qildi.

#Lionel Messi #PSJ