«Новая газета Европа» Белгород областига рейдда иштирок этганлардан бирининг ҳикоясини келтирди. Нашр суҳбатдоши ўз шахсини ва қайси тузилмага мансублигини очиқламаган (акцияда иштирок этганини «Россияга озодлик» ва «Россия кўнгиллилар корпуси» (РКК) маълум қилган). У фақат Россия фуқароси эканига ойдинлик киритган.

Рейд иштирокчиси ёмон об-ҳаво ва йўллар ювилиб кетгани туфайли «операцияни белгиланган муддатда бошлаш» имкони бўлмаганини айтган. «Кўплаб машиналар ботқоққа ботиб қолди, ҳатто уларнинг баъзилари кейинги ҳаракатларда иштирок эта олмади», — деган у ва чегарагача «ўнта машина ва зирҳли автомобиллар» ҳамда 150 нафарга яқин киши етиб бора олганини қўшимча қилган.

«Украина томонидан «Ураган» баравар ўт очиш реактив тизимларидан ҳеч қандай зарба берилгани йўқ. Биз ўзимиз чегарадаги «Грайворон» назорат-ўтказиш пунктини 120 мм калибрли миномётлардан ўққа тутдик», — деган суҳбатдош. Унинг сўзларига кўра, чегара пункти яхши мустаҳкамланганди, аммо, «гуруҳ танк кўмагида ҳужумга ўтганида, барча ҳимоячилар қочиб қолишган». Рейд иштирокчисининг сўзларига кўра, қочаётганлардан бири ўққа учиб ҳалок бўлган. Ертўлада бир неча соат яшириниб ётган яна бир чегарачи асир тушган.

У шунингдек Американинг иккита HMMWV машинаси акс этган кадрлар воқеа жойида бўлганини тасдиқлади, унинг айтишича, жиплар назорат-ўтказиш пунктидаги окопларга тиқилиб қолган.

«Назорат-ўтказиш пункти эгаллангач, биз белгиланган йўналишлар бўйлаб тарқала бошладик. Биринчи гуруҳ бориб, тинч аҳолини уйларидан чиқмаслик тўғрисида огоҳлантирди. Улар район марказигача тез етиб боришди. Иккинчи тўлқин ўтаётганида, мен унинг ичида эдим, қишлоқларда тирик жон йўқ эди. Кўчалар кимсасиз бўлиб қолганди», дейди у.

Нашр суҳбатдошининг сўзларига кўра, Россия кучлари фақат бир неча соат ўтганидан кейин «уйғонган» ва ўз қисмлари, артиллерия ва авиацияни олиб келиб, ўт оча бошлаган, лекин фақат «РКК ва «Россияга озодлик» легиони жангчилари турган чеккалар эмас, балки, улар диверсантлар эгаллаб олганини тахмин қилган бинолар ҳам нишонга олинган — ФХХ, ИИВ, маъмурият бинолари.

Рейд иштирокчиси унинг қуролдошлари орасида енгил жароҳат олганлар бўлганини маълум қилган, шу билан бирга, гувоҳларнинг сўзларига кўра, тинч аҳоли вакиллари орасида ярадорлар ҳам кўп бўлган. Унинг айтишича, Россия ҳарбийлари орасида анчагина киши ўлган ва яраланган.

Унинг сўзларига кўра, чегарадан ўтилганидан  бошлаб жиддий қаршиликка фақат район марказида дуч келинган — Грайворонда. Унинг айтишича, операциянинг дастлабки мақсади, айнан шу ерни эгаллаб олиш эди, аммо ноқулай об-ҳаво ва йўллар ёмонлиги туфайли амалиёт бошланиши ярим кунга кечиккан ҳамда «барча мақсадларга ҳам эришилмаган».

«Биз эндигина ўрганяпмиз. Бизнинг кучимиз ортмоқда. Такомиллашиб борамиз. Янги рейдлар уюштирамиз. Агар бу сафар район марказини эгаллашга ҳаракат қилган бўлсак, кейинги сафар област марказига қадар етиб боришга ҳаракат қилишимиз мумкин», — деган нашр суҳбатдоши.

• 22 май куни Белгород области ҳукумати Грайворон шаҳар округидаги қишлоқларга Украина ҳудудидан диверсантлар ҳужум қилганини маълум қилганди. Бу ҳужум учун жавобгарликни «Россия кўнгиллилар корпуси» ва «Россияга озодлик» легиони ўз зиммасига олган.
• 23 май куни РФ мудофаа вазирлиги диверсантлар қуршаб олиниб, 70 дан ортиқ киши ўлдирилгани ҳақида баёнот берди. Аммо воқеа жойидаги жасадлар акс этган кадрлар намойиш этилмаган. Намойиш этилган кадрлар эса экспертларда шубҳа уйғотган.
• 24 май куни Суми областида икки гуруҳ вакиллари журналистлар учун брифинг ўтказди ва РФ мудофаа вазирлиги баёнотини рад этиб, фақат «Россияга озодлик» легиони икки жангчисидан айрилгани, жами 10 жангчи яралангани ҳақида маълум қилди.