Британия парламенти Голодоморни - Украинадаги 1932-1933 йиллардаги очарчиликни - украин халқининг геноциди сифатида тан олди. Жамоалар палатаси депутатлари 25 май, пайшанба куни бир овоздан резолюцияни қўллаб-қувватладилар.
Овоз бериш ташаббускори бўлган консерватив партия матбуот котиби Полин Летҳемнинг айтишича, бу ҳаракат Россия президенти Владимир Путин ва бутун дунёга Британия парламенти Украинани қўллаб-қувватлаши ва ўтмишдаги ёки ҳозирги уруш жиноятларига тоқат қилмаслиги ҳақида аниқ сигнал юбориши керак.
"Совет Иттифоқи миллионлаб украиналикларни мажбурий очлик ва депортация сиёсати билан қириб ташлади. Бу Украинадаги бугунги воқеаларни эслатади. 1930-йиллардаги Сталин сиёсати каби, бугун ҳам украин халқи ва Украина ўзига хослигини йўқ қилишга ҳаракат кузатилмоқда", - дея қўшимча қилди Летҳем.
Украина Британия парламентининг қарорини олқишлади. Олий рада раиси Руслан Стефанчук ҳужжат муаллифлари Полин Летҳем ва Стюарт Макдоналдга миннатдорчилик билдирди. “Бу тарихий адолатни тиклаш қарори ва дунёга бундай жиноятлар ҳеч қачон такрорланмаслиги кераклиги ҳақида эслатишдир”, деди у.
