Xitoy Rossiyaga Moskvaning asosiy manfaatlari sohasida yordam taklif qildi. Xitoy rahbari Si Jinping Rossiya bosh vaziri Mixail Mishustin bilan uchrashuvda mamlakatlar bir-birini qo‘llab-quvvatlashda davom etishini va “ko‘p sohalarda hamkorlikni mustahkamlashi”ni aytdi. Bu haqda 24 may, chorshanba kuni “Sinxua” axborot agentligi xabar berdi.

Xitoy rahbarining aniqlik kiritishicha, Pekin Shanhay hamkorlik tashkiloti, BRIKS va G20 kabi xalqaro platformalarda hamkorlik qilishda Moskva bilan muvofiqlashtirishni kuchaytirish niyatida.

Rossiya bosh vaziri tashrif davomida Xitoy Xalq Respublikasi Davlat kengashi Bosh vaziri Li Tsyan bilan konstruktiv hamkorlikni yo‘lga qo‘yishni o‘zining asosiy vazifasi deb bilishini ta’kidladi. Mixail Mishustin “davlat rahbarlari darajasida erishilgan kelishuvlarni zudlik bilan amalga oshirish uchun hukumatlar o‘rtasida samarali hamkorlikdagi ishlarni tashkil etishga” umid qilishini qo‘shimcha qildi.

Mishustin RF bosh vaziri lavozimidagi ilk rasmiy tashrifi bilan 22 may kuni Xitoyga bordi. U Shanhayga yetib bordi va u yerda Xitoy-Rossiya biznes-forumida ishtirok etdi. Keyin bosh vazir Pekinga yo‘l oldi va u yerda 24 may kuni Li Tsyan hamda Si Jinping bilan uchrashdi. Tashrif doirasida bir qator ikki tomonlama hujjatlar, jumladan, savdo hamkorligini kengaytirish bo‘yicha memorandum imzolandi.