Rossiyada 1993 yildan beri muntazam o‘tkazib kelinayotgan va bu yil 16-marotaba o‘tkazilishi kerak bo‘lgan Xalqaro aviakosmik salon (XAKS) xavfsizlik nuqtayi nazaridan noma’lum muddatga qoldirilgan. Bu haqda 25 may, payshanba kuni «Kommersant» gazetasi manbalarga tayanib xabar berdi.

Tadbir 25-30 iyul kunlari bo‘lib o‘tishi kerak edi, ammo endi u faqat 2024 yilda, hatto undan keyin ham o‘tkazilishi mumkin, deb hisoblaydi nashr suhbatdoshlari. Ulardan biri salon joriy yilning oxirigacha «Moskvadagi maydonlardan birida pavilon formatida» o‘tkazilishi mumkinligini istisno etmadi. 

«Kommersant» nashrining yozishicha, aviasalonning keyinga qoldirilganiga tashkilotchilar xavfsizlik choralarini kerakli darajada ta’minlay olmagani sabab bo‘lgan: tadbirga kuniga o‘n minglab odamlar tashrif buyuradi, joy ochiq va parvoz dasturiga chetdan aralashuv xavfi mavjud. «Ehtimol, xavfsizlik choralarini kuchaytirish mumkin, ammo dronlardan kelib chiqadigan potensial tahdidlarga qarshi radioelektron kurash uslublaridan foydalanish parvoz dasturiga xalaqit beradi», deb tushuntirdi «Rostex»ga yaqin manba. 

«Vedomosti»ning yozishicha, XAKS ham xavfsizlik nuqtayi nazaridan, ham G‘arb sanksiyalari fonida xorijiy kompaniyalarning ishtiroki cheklanganligi sababli keyinga qoldiriladi. Moskva viloyatida qulagan dronlar bo‘laklari bir necha bor topildi. 3 may kuni Moskva Kremliga uchuvchisiz uchoqlar hujum qildi, shundan so‘ng Rossiya poytaxtida dronlarni uchirish taqiqlandi.