Suriya prezidenti Bashar Asad 19 may, juma kuni ochilgan Arab davlatlari ligasi sammitida ishtirok etish uchun Saudiya Arabistoniga keldi. Suriyaning al-Watan gazetasi yozishicha, Suriya rahbari Jiddada arab davlatlari rahbarlari bilan qator ikki tomonlama uchrashuvlar o‘tkazadi. Asadning Arab davlatlari ligasi ishida ishtirok etishi uning o‘n yildan ortiq izolyatsiyadan so‘ng jahon diplomatik maydoniga qaytishini anglatadi, deya ta’kidlaydi AFP axborot agentligi.
2011 yil noyabrida Suriyada hukumatga qarshi namoyishlarning keskin bostirilishi va mamlakatda qurolli mojaroning boshlanishi fonida Arab davlatlari ligasi Damashqning o‘z ishidagi ishtirokini to‘xtatdi. 2012 yilda Saudiya Arabistoni Suriyaning qurolli muxolifati tomonida harakat qilib, Asad rejimi bilan aloqalarini uzdi. Aksariyat arab davlatlari ham xuddi shunday pozitsiyaga amal qilishdi.
Biroq Asad rejimining fuqarolar urushi davrida Rossiya va Eron ko‘magida erishgan muvaffaqiyatlari so‘nggi paytlarda mintaqa davlatlarining Suriyaga nisbatan pozitsiyalarini qayta ko‘rib chiqishga olib keldi. Bu yerda mintaqaviy raqobatchilar - Eron va Saudiya Arabistonining yaqinlashuvi muhim rol o‘ynadi. Bu Xitoy diplomatiyasining sa’y-harakatlari natijasida sodir bo‘ldi.
2023 yil 7 may kuni Arab davlatlari ligasi mamlakatlari tashqi ishlar vazirlari AQShning bu qadamdan norozi bo‘lishiga qaramay, Suriyani tashkilotga qaytarishga qaror qildi. Hozirda arab dunyosida Asad bilan yaqinlashishga yagona qarshi davlat - Qatar. Biroq u Suriyaning Arab davlatlari ligasiga qaytishiga ochiq qarshi chiqmadi, bu Bashar Asad hokimiyatini qonuniylashtirishda muhim qadam bo‘lyapti. Bundan tashqari, Arab davlatlari ligasiga a’zolikning yangilanishi Damashqqa qo‘shnilari bilan savdo aloqalarini rivojlantirish, shuningdek, Fors ko‘rfazining boy davlatlaridan iqtisodiy yordam va sarmoya olish imkoniyatini beradi.
