O‘zbekistonda Ispaniya ta’lim dasturlari joriy etiladi

O‘zbekiston elchixonasida Ispaniya Ta’lim va kasbga o‘qitish vazirligi hamda Ta’limni xalqarolashtirish xizmati (SEPIE) mutasaddilari bilan uchrashuv bo‘lib o‘tdi, deb xabar bermoqda «Dunyo».

Unda O‘zbekiston va Ispaniya o‘rtasida o‘rta maxsus va oliy ta’lim yo‘nalishlarida hamkorlikni yanada rivojlantirish masalalari  muhokama qilindi.

Bo‘lib o‘tgan muzokaralarda xorij tomoni ispan tilini o‘qitishni O‘zbekiston maktablarida, xususan, birinchi galda iqtidorli o‘quvchilar tahsil olayotgan Prezident maktablarida ikki tilli bo‘limlar dasturi, chet tili o‘qituvchilarning yordamchilari dasturi, Ispaniya ta’lim va kasbga o‘qitish vazirligining resurs markazlari faoliyatini joriy qilish orqali hamkorlik aloqalarini yo‘lga qo‘yishni taklif etdi.

Hozirgi kunda ushbu ta’lim dasturlari Lotin Amerikasi, AQSh, Yevropa mamlakatlari, Xitoy, Rossiya va boshqa davlatlar maktablarida keng joriy qilingan.

Ispan tili dasturlari joriy qilingan maktablar boshqa ta’lim muassasalariga nisbatan mavqeyi yuqori bo‘lib, iqtidorli o‘quvchilarga milliy shahodatnoma bilan birga Ispaniya shahodatnomasi taqdim etiladi. Dasturda ishtirok etgan maktablar Ispaniya tili va madaniyati burchaklari va muzeylari bilan ta’minlanadi.

Ushbu yo‘nalishlarda hamkorlik aloqalarini o‘rnatish masalalarini muhokama qilish maqsadida joriy yilning 24-27 aprel kunlari O‘zbekistonga amaliy safar bilan kelayotgan Ispaniya delegatsiyasi  dasturidan Maktabgacha va maktab ta’limi vazirligi huzuridagi Ixtisoslashtirilgan ta’lim muassasalar agentligi rahbariyati bilan muzokaralar olib borish hamda Toshkent va Samarqand shaharlaridagi Prezident maktablari faoliyati bilan tanishish o‘rin olgan.