Туркия парламенти 31 март, жумага ўтар кечаси Финландиянинг НАТОга кириши ҳақидаги протоколни ратификация қилди. Тегишли қарор учун 276 нафар туркиялик депутат овоз берди, ҳеч ким бунга қарши чиқмади. Ҳужжат ҳали Туркия президенти Ражаб Тоййиб Эрдўған томонидан имзоланиши керак.

Туркия Шимолий Атлантика иттифоқига аъзо 30 давлат ичида Финландиянинг унга қўшилишини маъқуллаган охирги давлат бўлди. Шу ҳафта бошида Венгрия парламенти Финландиянинг НАТОга аъзолигини ратификация қилиш учун овоз берди.

НАТО Бош котиби Йенс Столтенберг протоколнинг Туркия парламенти томонидан ратификация қилинишини олқишлаб, бу ҳарбий иттифоқни «кучлироқ ва хавфсизроқ» қилишини айтди.

Швеция ва Финландия 2022 йил май ойида Россиянинг Украинага ҳарбий бостириб кириши муносабати билан анъанавий бетарафликдан воз кечди ва НАТОга аъзо бўлиш учун ариза берди. Швеция томонининг аризаси ҳозирча на Венгрия, на Туркия томонидан маъқулланмаган.

Украинадаги уруш ҳаттоки яқин кунларда тугаса ҳам, хавфсизлик муҳити узоқ муддатга ўзгарди. Бундай баҳони НАТО Бош котиби Йенс Столтенберг 21 март куни альянснинг Брюсселдаги штаб-квартирасида НАТОнинг 2022 йилдаги фаолияти натижаларини тақдим этган матбуот анжуманида билдирди.

Столтенбергнинг сўзларига кўра, «асосийси Швеция ва Финландия тезда НАТОнинг тўлақонли аъзосига айланишларидир». Бу мамлакатларнинг иттифоққа қабул қилиниши уларни хавфсизроқ, НАТОни эса кучлироқ қилади. Бундан ташқари, бу қадам альянс эшиклари очиқлигини кўрсатади, дея таъкидлади ташкилот Бош котиби.

Россиянинг Украинага қарши урушига изоҳ берар экан, Столтенберг Ғарб иттифоқчилари учун «бу шок бўлгани, аммо кутилмаган ҳолат бўлмаганини» таъкидлади. «Бу [Россиянинг Украинага ҳарбий бостириб кириши] тажовузкор ҳаракатлар моделининг чўққиси бўлди», деб тушунтирди НАТО Бош котиби.