Avstriyaning Raiffeisen Bank International (RBI) guruhi rossiyalik shu’basini sotishni yoki uni guruh tuzilmasidan olib tashlashni rejalashtirmoqda, dedi kompaniya rahbari Yoxann Shtrobl 30 mart, payshanba kuni bo‘lib o‘tgan aksiyadorlar yig‘ilishida.

RBI ehtimoliy kelishuvning hech qanday parametrlarini taqdim etmadi, faqat u «mahalliy va xalqaro qonunlar va qoidalarga to‘liq rioya qilgan holda» va «tegishli vakolatli organlar bilan maslahatlashgan holda» amalga oshishini bildirdi. «Rossiyada biznes yuritish uchun bozor sharoitlari juda qiyin. Rossiyada biznesni sotishni tartibga soluvchi mahalliy va xalqaro qonunlar va qoidalar doimiy ravishda o‘zgarib turadi», - deya ma’lum qildi RBI.

Financial Times gazetasiga bergan intervyusida Shtroblning aniqlik kiritishicha, RBI rossiyalik biznesning potensial xaridorlari ro‘yxatini ikkita «yashovchan» da’vogargacha qisqartirgan va ular bilan yaqin haftalarda faol ishlaydi. 2022 yilda RBI'ning Rossiya bo‘limi 2,2 milliard yevro foyda ko‘rdi, bu butun guruh foydasining deyarli 60 foizini tashkil etdi, deb ta’kidlaydi FT.

RBI, shuningdek, Rossiyadagi biznes va «tadbirkorlik faoliyatini» qisqartirishda davom etishini xabar qildi, biroq hozirda bank litsenziyasi shartlariga rioya qilish uchun mamlakatda ba’zi bank bo‘linmalarini saqlab qolish variantini ko‘rib chiqmoqda.