Германия ва Италия ҳукумати Мексикага Колумбгача бўлган цивилизацияларга оид 80 дан ортиқ ноёб артефактларни қайтариб берди, деб хабар қилди dpa ахборот агентлиги. Маданий бойликларнинг ватанга қайтарилиши муваффақиятли ҳамкорликнинг белгиси эди, деди Мексика маданият вазири Алехандра Фраусто. 40 та экспонат Германиядан самолётда келтирилди, жумладан олмеклар давридаги инсон боши шаклидаги улкан базальт ҳайкал ҳам, унинг ёши уч минг йилдан ортиқдир.

Артефактлар Мехико шаҳридаги Темпло Майор очиқ осмон остидаги ноёб музей мажмуасида - 1522 йилда испан конкистадорлари томонидан вайрон қилинган ацтекларнинг собиқ асосий ибодатхонасида намойиш этилади.

Мехико шаҳридаги президент қароргоҳи, Миллий саройда (Palacio Nacional) Мексика президенти Андрес Мануэл Лопес Обрадор ҳамда Германия ва Италия ҳукуматлари вакиллари иштирокида топшириш маросими бўлиб ўтди.

2018 йилдан бери 11 мингдан ортиқ ашёлар мамлакатга қайтарилган, улар мусодара қилинган ёки эгалари томонидан ихтиёрий равишда берилган, деди Мексика маданият вазири. Фраусто 3 апрел куни Парижда Колумбгача бўлган цивилизацияларга оид 83 та артефактнинг аукционини бекор қилишга чақирди. Унинг сўзларига кўра, бу маданий қадриятлар, худди ички безак буюмлари каби сотувга қўйилган. Мексиканинг ўзида 80 йилдан ортиқ вақт давомида мамлакатдан маданий бойликларни олиб чиқиш тақиқланган.