Украинадаги урушнинг оқибати, шунингдек, дунё давлатлари томонидан пул-кредит сиёсатининг кескинлашуви 2023 йилда глобал иқтисодий ўсишнинг 3 фоиздан кам бўлишига олиб келади. Бундай прогнозни Халқаро валюта жамғармаси (ХВЖ) раҳбари Кристалина Георгиева 30 март, пайшанба куни Боао Осиё форумида айтиб ўтди.

«Жаҳон иқтисодиёти анча вақтдан бери нотинч муҳитда бўлиб, шок ортидан шокни бошдан кечирмоқда. Биз 2023 йилни яна бир қийин йил бўлишини кутмоқдамиз», деди у.

«Узоқ даврдаги паст фоиз ставкаларидан инфляцияга қарши курашиш учун зарур бўлган анча юқори ставкаларга тез ўтиш баъзи ривожланган иқтисодиётларда муқаррар равишда банк секторида нотинчликни келтириб чиқарди ва сиёсий қарорларни янада қийинлаштирди», деб давом этди ХВЖ раҳбари. Унинг фикрича, жаҳон иқтисодиётини кутаётган қийинчиликларни енгишнинг ягона йўли ҳамкорлик ва ҳамжиҳатликдир.

Глобаллашувнинг жаҳон иқтисодиёти, жумладан, Осиё минтақасидаги давлатларнинг ривожланиши нуқтайи назаридан қандай фойда келтираётганини эслаб, Георгиева огоҳлантирди: «Аммо биз глобаллашувнинг афзалликлари мамлакатлар ва одамлар ўртасида тенг тақсимланмаганини ҳам тан олишимиз керак. таъминот занжирлари янада ишончли ва диверсификацияланган бўлиши керак».

30 январь куни ХВЖ 2023 йилда жаҳон ялпи ички маҳсулоти ўсиши прогнозини 2,9 фоизгача яхшилади. Бу 2022 йил октябр ойида кутилганидан 0,2 фоизга кўпдир. Шу билан бирга, ташкилот 2024 йилга мўлжалланган глобал ялпи ички маҳсулот ўсиши прогнозини 0,1 фоизга пасайтириб, 3,1 фоизга туширди. Иккала кўрсаткич ҳам 2000-2019 йиллардаги ўртача кўрсаткичдан анча паст (3,8 фоиз).

21 март куни ХВЖ Киев билан Украинага 15,6 миллиард доллар миқдорида тўрт йиллик кредит дастурини келишиб олганини маълум қилди. Bloomberg эслатишича, бу фонд тарихидаги ҳарбий ҳаракатлар кетаётган давлатга ажратилган биринчи кредит бўлди.

Украина Миллий банки маълумотларига кўра, 2022 йил охирида мамлакатнинг ташқи қарзи 132 миллиард долларни ташкил этиб, мамлакат ялпи ички маҳсулотининг 89 фоизига етган.