Polsha snaryadlar ishlab chiqarishni kengaytirish niyatida

Jahon 08:42 / 30.03.2023 3243

Rossiyaning Ukrainaga qarshi tajovuzkorligi fonida Polsha rasmiylari artilleriya o‘q-dorilarini ishlab chiqarishni rag‘batlantirish niyatida. Bosh vazir Mateush Moravetskiy 29 mart, chorshanba kuni o‘q-dorilar ishlab chiqarish bo‘yicha yangi milliy dasturni amalga oshirish maqsadida hukumat mahalliy va xorijiy ishlab chiqaruvchilarni qo‘llab-quvvatlash uchun 2 milliard zlotiy (taxminan 427 million yevro) ajratishini ma’lum qildi.

Bundan tashqari, Polsha hukumati qiymati 12 milliard zlotiy (2,6 milliard yevro) bo‘lgan 800 mingta artilleriya snaryadlariga buyurtma beradi. Moravetskiyning ta’kidlashicha, Ukrainadagi janglarning so‘nggi oylari Polsha va uning g‘arbiy ittifoqchilariga jang maydonida qancha artilleriya o‘q-dorilari qo‘llanilganini ko‘rsatgan. Uning so‘zlariga ko‘ra, bu raqam Fransiya, Germaniya va Yevropa Ittifoqining boshqa davlatlarining hozirgi ishlab chiqarish quvvatlaridan bir necha barobar ko‘pdir.

Polsha hukumati rahbari 155 mm yoki 120 mm artilleriya o‘q-dorilariga bo‘lgan talab katta ekani sababli zavodlar ularni oson va tez sota olishini ta’kidladi.

Moravetskiy Varshavada hukumat tomonidan qabul qilingan o‘q-dorilarni ishlab chiqarish bo‘yicha milliy dastur 1-2 yilga mo‘ljallanganligini ta’kidladi.

Polsha Rossiyaning keng ko‘lamli tajovuzini qaytarishga urinayotgan Ukrainaga G‘arb qurollarini yetkazib berishda muhim o‘tkazish punkti rolini o‘ynaydi. Ushbu mojaroning kuchayishidan qo‘rqib, bu NATO davlati qayta qurollanish dasturini amalga oshirmoqda, deya qayd etadi dpa.

Ko‘proq yangiliklar: