O‘zbekiston gaz taqsimlash tizimi 200 mln yevro evaziga modernizatsiya va rekonstruksiya qilinadi

O‘zbekiston 18:03 / 30.03.2023 3715

«Hududgazta’minot» AJ va Italiyaning yetakchi kompaniyalari o‘rtasida O‘zbekiston gaz ta’minoti tizimini yanada takomillashtirish va ilg‘or xorijiy tajribaga ega malakali mutaxassislarni tayyorlashga qaratilgan bir qator bitim va shartnomalar imzolandi.

Erishilgan kelishuvlarga muvofiq, «Hududgazta’minot» AJ tomonidan «Pietro Fiorentini S.p.A.» kompaniyasi bilan hamkorlikda «O‘zbekiston gaz taqsimlash tizimini modernizatsiya va rekonstruksiya qilish» loyihasi amalga oshiriladi. Mazkur loyiha SACE (Italiya) davlat eksport-kredit agentligi tomonidan 200 million yevro miqdorida jalb qilinadigan mablag‘lar hisobidan moliyalashtiriladi. Shuningdek, «HGT Training» o‘quv markazi negizida gaz sohasi uchun ilg‘or Italiya tajribasi asosida yetuk muhandislarni tayyorlash maktabi tashkil etiladi.

Gaz jihozlari va qurilmalarini ishlab chiqaruvchi «Pietro Fiorentini S.p.A.» kompaniyasi zamonaviy gaz tartiblash punktlari (GTP), bosim rostlagichlar, fil’tr va boshqa komponentlarni, «Terranova S.R.L» kompaniyasi tomonidan esa gaz tartiblash punktlarini masofadan monitoring va nazorat qilishga imkon beruvchi telemetriya tizimi yetkazib beriladi.

«Pietro Fiorentini S.p.A.» 80 yildan ortiq tarixi davomida tabiiy gazni qazib chiqarish, tashish va foydalanish uchun yuqori sifatli texnologik uskunalarni yaratish va ishlab chiqarish bilan shug‘ullanuvchi xalqaro darajadagi kompaniya hisoblanadi.

«Terranova S.R.L» elektr energiyasi, gaz va suvni taqsimlash va sotish faoliyati uchun dasturiy mahsulotlarni ishlab chiqish bilan shug‘ullanadi. Kompaniya kommunal xizmatlar ko‘rsatuvchi kompaniyalarga keng qamrovli dasturiy yechimlarni taqdim etadi (intellektual hisobga olish va hisob-kitob qilish dasturlari, ishchi kuchini avtomatlashtirish, bek-ofis).

Ko‘proq yangiliklar: