Европа Иттифоқи давлатлари Россиядан суюлтирилган газ олишни чеклаш устида ишламоқда. Бу ҳақда 28 март, сешанба куни Брюсселда бўлиб ўтган матбуот анжуманида энергия масалалари бўйича Европа комиссари Кадри Симсон маълум қилди. Унинг сўзларига кўра, Европа Иттифоқи мамлакатлари энергетика вазирлари Брюсселда бўлиб ўтган ЕИ Кенгашида Россия ва Беларус суюлтирилган газ экспортчиларининг унда иштирок этишини вақтинча тақиқловчи газ бозори учун янги қоидалар бўйича таклифни муҳокама қилишган.
Таклиф Европа Иттифоқи мамлакатлари учун газ етказиб бериш, жумладан, суюлтирилган газ бўйича инфратузилмадан фойдаланишни вақтинча чеклаш имкониятини ўз ичига олади. "Ўтган йили олдинги йилларга нисбатан кўпроқ суюлтирилган газ олган Ғарбга давлатлари ҳам ушбу чоралардан фойдаланишлари мумкин ва улар, масалан, суюлтирилган газга қарши потенциал янги санкциялар тўпламига қарамай, миллий даражада бу чораларни кўришлари мумкин. Агар миллий хавфсизлик талаб қилса, улар буни қилишлари мумкин", - деб жавоб берди Европа комиссари DW'нинг саволига.
Унинг сўзларига кўра, мамлакатлар умумий ёндашувни маъқуллаган ва энди Европарламент ҳамда ЕИ Кенгаши муҳокамаларни бошлаши мумкин. Улар муваффақиятли якунлангандан сўнг, Европа Иттифоқига аъзо давлатлар янги тартибга солиш жараёнини қўллашни бошлайди.
Оддий газдан фарқли ўлароқ, Россиянинг Украинага кенг кўламли бостириб кириши бошланганидан бери Россиядан Европа Иттифоқига суюлтирилган газ импорти ошди. Reuters агентлигининг Европа Иттифоқи ҳужжатига таяниб ёзишича, Россиянинг Европа Иттифоқига суюлтирилган газ етказиб бериш ҳажми 2021 йилдаги 16 миллиард куб метрга нисбатан 2022 йилда 22 миллиард куб метрга етган.
