Shotlandiyada sensatsiya, yana ikki jamoa yo‘qotishsiz ketmoqda. Yevropada kun o‘yinlari

Sport 11:36 / 29.03.2023 34294

A guruhi

Maktominayning porlashi

Gruziya — Norvegiya 1:1
Gollar: Mikautadze (60) — Syorlot (15). 
Gruziya – Mamardashvili, Kakabadze, Kashiya, Kverkveliya, Tabidze (Zivzivadze, 59), Azarov (Gocholeyshvili, 70), Kvekveskiri, Aburjaniya (Gagnidze, 90), Davitashvili (Lobjanidze, 59), Kvaratsxeliya, Mikautadze (Beridze, 90).
Norvegiya – Nyuland, Pedersen (Ryuerson, 90), Strannberg, Estigor, Meling, Eursnes, Berg (Torstvedt, 90), Edegor, Elyunussi (Berge, 78), Solbakken (Bryunhildsen, 82), Syorlot.

Batumidagi o‘yinda ajoyib afisha bo‘lishi mumkin edi — A Seriyaning eng yaxshi futbolchisi APLning eng yaxshi to‘purariga qarshi. Ammo Holand jarohat tufayli safdan chiqdi, ammo stadionga kelganlarni bu ranjitmagani aniq. Asosiysi, Rossiyaning Ukrainadagi bosqinidan keyin mamlakatni tark etishga qaror qilgan va «Napoli»ga o‘tishidan oldin Batumidagi «Dinamo» klubida yarim mavsum o‘tkazgan Kvaratsxeliya maydonda edi.

Mezbonlar o‘yinni yaxshi boshlay olmasdan, tezkor gol o‘tkazib yuborishgani uchun Xvichadan yetakchilik qobiliyatlarini namoyish qilish talab etilardi. Gurjistonliklarga muammo Serlot tomonidan tug‘dirildi, ispanlarga qarshi o‘yinda o‘z imkoniyatlaridan foydalana olmagan ushbu hujumchi jarima maydoni ichida reyd amalga oshirib, to‘pni darvoza burchagiga shunday yo‘naltirdiki, darvozabon Mamardashvili joyidan siljiy olmadi. Agar darvozabon Elyunussining yaqin masofadan yo‘llagan zarbasini to‘smaganida, Eursnes esa uch metr masofadan turib qaytgan to‘pni darvozaga kiritib yubora olganida, gurjistonliklar jamoasi uchun barchasi juda yomon kechishi tayin edi.

Jamoani hayotga «Rubin»ning sobiq futbolchilari qaytarishdi. Avvaliga Xvicha o‘ziga xos uslubda qanotdan markazga ko‘chib, hujum uyushtirdi, ammo uning zarbasi darvoza ustunidan bir necha santimetr masofadan o‘tib ketdi. Keyin esa Davitashvili maydon markazidan reyd uyushtirdi, faqat jarima maydoni ichida himoyachi to‘pni uning oyog‘i ostidan olib qo‘ydi. Bu hujumlar gol bilan yakunlanmadi, ammo o‘yin xarakteri o‘zgardi. Tanaffusdan keyin mezbonlar o‘yinga yana tezlik qo‘shishdi va Mikautdzening javob goli voqealarning mantiqiy rivoji bo‘ldi.

Ammo, Gurjistonning ustunligi va Kvaratsxeliyaning uzoq masofadan xavfli zarbasiga qaramay, g‘alabaga norveglar yaqinroq bo‘lishdi. Faqat Mamardashvili Serlotning xavfli zarbasini qaytargani va Edegor juda qulay vaziyatdan xato zarba bergani tufayli tablodagi raqamlar o‘zgarmay qoldi. Shunday ekan, Villi Sanyol jamoasi uchun turnir ochilishidagi durang — juda yomon natija emas, skandinavlar esa Holandsiz startda muvaffaqiyatsizlikka uchrab, ikki o‘yinda birgina ochko bilan kifoyalanishdi.

Shotlandiya — Ispaniya 2:0
Gollar: Maktominey (7, 51). 
Shotlandiya – Gann, Xiki (Patterson, 82), Henli, Tirni (Kuper, 76), Porteus, Roberson, Makgregor, Maktominey, Makginn (Fergyuson, 83), Kristi (Maklin, 75), Dayks.
Ispaniya – Arrisabalaga, Porro (Karvaxal, 46), Martines, D.Garsiya, Gayya, Sebalyos (Gavi, 79), Merino (Aspas, 57), Rodri, Pino, Oyarsabal (Uilyams, 46), Xoselu (Iglesias, 66).

Saralash startidagi yirik hisobdagi g‘alabasi «Qizil furiya»ning mudofaadagi kamchiliklarini maskirovka qilgandi. Umuman olganda, yaratilgan vaziyatlardan kelib chiqib, o‘sha 3:0 hisobi o‘rniga 3:3 hisobi bo‘lishi ham mumkin edi. Norveglar o‘z vaziyatlarini ko‘kka sovurgan bo‘lishsa, shotlandlar foydalanishdi. Qanotda toyib ketgan Pedro Porro to‘pni Robersonga sovg‘a qildi, u esa to‘pni markazda ochilgan Maktominayning yo‘liga tashlab berdi. «MYu» yarimhimoyachisi kurajni ushladi va Kipr bilan o‘yinda bo‘lgani kabi (u ikkinchi bo‘limda zaxiradan tushib, ikki gol urgandi) bu o‘yinda ham dubl rasmiylashtirdi.

Ispanlarda esa birinchi turda ajoyib joker vazifasini o‘tagan Xoselu seshanba oqshomidagi o‘yinda boshlang‘ich tarkibdan joy oldi. Ammo unga Maktominaydan farqli o‘laroq omad yetishmadi va uning zarbasi to‘singa tegdi. Shotlandiyani vaqti-vaqti bilan jarima maydoniga qamab qo‘ygan ispanlarning boshqa zarbalariga ham aniqlik yetishmadi. Xususan, shu kuni terma jamoada debyut qilgan 29 yoshli himoyachi David Garsiya bosh bilan juda xavfli zarba berdi.

Endi bu o‘yindan kelib chiqqan holda ispanlar Maktominaydan samaradorlik borasida saboq olishlari kerak. Va, albatta, mudofaada xatolarga yo‘l qo‘ymasliklari talab etiladi, ikkinchi bo‘limda Karvaxal ham Tirni bilan duelni boy berdi va uni oldinga o‘tkazib yubordi. «Arsenal» futbolchisi esa to‘p bilan jarima maydoniga kirib bordi va uning uzatmasi himoyachidan qaytganidan keyin Maktominay hisobdagi farqni oshirdi. Maydon markazida ham barchasi ko‘ngildagidek emas, golli hujumda to‘p ichkaridan chiqib kelgan gol muallifining oyoqlariga tashlab berildi. Ispaniyaning shunday xatolari tufayli Maktominay — dastlabki turlarning eng yaxshi futbolchisi bo‘lish uchun da’vogarlardan biriga aylandi. Saralashgacha 37 uchrashuvda faqat bir gol urgan ushbu tayanchhimoyachisining to‘purarlik qobiliyati kashf etildi va u to‘liq bo‘lmagan ikki o‘yinda 4 gol urishga ulgurdi.

Qizig‘i shundaki, o‘tgan safargi Yevro saralashlarida ham Ispaniyaga bir o‘yinda bittadan ortiq golni Britaniya orollari vakillari urishgandi — shimoliy irlandiyalik Hili 2006 yil sentabrida het-trik amalga oshirgan. O‘shanda «Qizil furiya» sensatsion ravishda yutqazgan (2:3), lekin osmon uzilib yerga tushmagan. Ispanlar keyingi o‘yinda shvedlarga yutqazgan, ammo yakunda Yevropa chempionlariga aylanishgan. Faqat hozir Luis de la Fuentega savollar ko‘p. U Ispaniyaning 1991 yildan buyon ilk safar uchrashuvini yutqazgan ilk murabbiyiga aylandi. Shotlandiya esa so‘nggi 39 yillikda ilk bor ushbu raqibni mag‘lub etdi

17 iyun. Norvegiya — Shotlandiya, Kipr — Gurjiston.

D guruhi

Xorvatlar startdagi muvaffaqiyatsizlikdan keyin o‘zga kelishdi

Turkiya — Xorvatiya 0:2
Gollar: Kovachich (20, 45+4). 
Turkiya – Gunok, Chelik, Demiral, Suyunchi, Kadio‘g‘li, Chalxono‘g‘li.(Yuksek, 38), O‘zjan, Kekchyu (Gyuler 67), Under, Oqturko‘g‘li (Yilmaz, 67), Unal (Nayir, 81).
Xorvatiya – Livakovich, Stanishich, Shutalo, Gvardiol, Barishich, Modrich, Kovachich, Brozovich, Perishich, Pashalich (Yuranovich, 65), Kramarich.

Turkiyaning fevral oyidagi zilziladan buyon ilk uy uchrashuvi futbolchilar uchun katta ishtiyoq berardi. Mezbon fanatlar ham bu o‘yinni munosib o‘tkazishga harakat qilishdi va tabiiy ofatdan jabrlangan barcha shaharlar aks etgan va «Biz qiyinchiliklarni birgalikda yengib o‘tamiz. Biz yelkama-yelka turib yorqin kelajak quramiz» yozuvlari aks etgan ulkan banner tayyorlashdi.

Ammo debyutdagi faollik turklarga natija keltirmadi va jamoa to‘qqiz yil ichida ilk bor saralash turniridagi ilk uy uchrashuvida mag‘lub bo‘ldi. Epizodlardan birida Xorvatiyani Oqturko‘g‘lining zarbasini burchakdan olib chiqqan Livakovich qutqardi. Keyingi vaziyatda darvoza ishg‘ol etilishi ofsayd tufayli bekor qilindi, «shashkachilar»ning hujumlari esa hujumga ikkinchi tempda qo‘shilgan Kovachichning goli bilan yakunlandi. U birinchi bo‘limga qo‘shib berilgan daqiqalarda jamoasi ustunligini mustahkamladi va Zlatko Dalich jamoasini birinchi turda kuzatilgani kabi asabiy yakundan qutqardi.

Uels — Latviya 1:0
Gol: Mur (41).

Xorvatiya Uelsga qarshi o‘yindan saboq chiqardi, ammo guruh jadvalida baribir «ajdarlar»dan pastroqda joylashgan, chunki Yevro saralashida ochkolar teng kelgan taqdirda, JCh saralashidan farqli o‘laroq, barchasini to‘plar nisbati emas, o‘zaro uchrashuvlardagi natija hal qiladi. Avvalgi turda dam olgan va bu o‘yinga o‘yin uslubi jihatdan uelsliklarga yaqin bo‘lgan irlandlar bilan o‘rtoqlik uchrashuvida (2:3) tayyorgarlik ko‘rgan Latviya esa Uelsni standart vaziyatlarda ham qiynab qo‘ydi. Ammo muxlislar va jamoaning sobiq yetakchisi Garet Beyl ko‘z o‘ngida harakat qilgan mezbonlar birinchi bo‘lim oxirida britancha klassika namoyish etishdi, Jyeymsning yuqorilatib berilgan uzatmasiga Mur barchadan balandroq sakradi. 2019 yilda milliy jamoada debyut yilgan ushbu forvard — 10 gol bilan uelsliklarning eng yaxshi to‘purari bo‘lib turibdi.

16 iyun. Uels — Armaniston, Latviya — Turkiya.

I guruhi

Kosovodagi sensatsiya

Shveytsariya — Isroil 3:0
Gollar: Vargas (39), Amduni (48), Vidmer (52). 
Shveytsariya – Zommer, Vidmer, Elvedi, Akanji, Rodriges, Jaka, Froyler, Zakariya (Rider, 74), Vargas (Fassnaxt, 74), Itten (Okafor, 68), Amduni (Shteffen, 69).
Isroil – Glazer, Dasa, Migel Vitor, Shlomo, Leydner, Haziza (Yexezkel, 53), Solomon, Perets (Kanixovskiy, 73), Lavi, Jaber (Glux, 54), Baribo (Veysman, 63).

Birinchi turda Belarus ustidan 5:0 hisobida g‘alaba qozongan Shveytsariya isroilliklarning qarshiligiga duch keldi, ammo bo‘limlar yakuni va boshidagi gollar tufayli g‘alabaga erishdi. Hal qiluvchi ikki golda ham Froyler ishtirok etdi, u dastlab Vargasga assistentlik qildi, keyin esa u yo‘llagan zarba qaytarilganida, qaytgan to‘pni Zeki Amduni darvoza to‘riga kiritib yubordi.

Saralash sikli startiga qadar «Bazel»ning ushbu 22 yoshli hujumchisi terma jamoada faqat Millatlar ligasida jami 11 daqiqa o‘ynagandi. Ammo Shaqiri jarohat olishi Amduniga imkoniyat taqdim etdi va u ikki o‘yinda ham gol urib, o‘ziga bildirilgan ishonchni oqladi. Natijada  Shveytsariya saralash bosqichini JCh-1994 saralashidan buyon ikki g‘alaba bilan boshladi. Jamoaning hozirgi bosh murabbiyi Murat Yakin o‘shanda hali futbolchi sifatida ham milliy jamoada debyut qilmagandi.

Ruminiya — Belarus 2:1
Gollar: Stanchu (17), Burke (19) — Morozov (86).

Kosovo — Andorra 1:1
Gollar: Jyegrova (59) — Rosas (61).

Boshqa o‘yinlarga kelsak, Belarus u qadar umidsiz ko‘rinmadi. Garchi avvaliga jarima zarbasidan o‘tkir burchakka yo‘llangan to‘p darvoza to‘riga kirgan, ikki daqiqa o‘tib ikkinchi gol o‘tkazib yuborilgan bo‘lsa-da, jamoa o‘yinni tashlab qo‘ymadi. Ayrim vaziyatlarda, masalan to‘p darvoza to‘siniga tekkanida belaruslarning omadi keldi, ammo jamoa qiziqarli hujumlar ham uyushtirdi va o‘yin yakunida chiroyli javob goli urishdi. Faqat bu gol guruh jadvaliga ta’sir ko‘rsatmaydi, unda esa Kosovoda durangga erishgan Andorra ham yuqoriroqda joylashgan.

16 iyun. Andorra — Shveytsariya, Belarus — Isroil, Kosovo — Ruminiya.

Ko‘proq yangiliklar: