Италияда АҚШ талаби билан ҳибсга олинган, Красноярск губернатори Александр Усснинг ўғли, россиялик тадбиркор Артем Усс шериклари ёрдамида уй қамоғидан қочишга муваффақ бўлди, деб ёзади 28 март, сешанба куни Италия ОАВ. Шу билан бирга, терговчилар қочиб кетишда Россия махсус хизматларининг иштироки борлигини истисно қилмаяпти, деб ёзмоқда Corriere della Sera ва La Repubblica газеталари терговга таяниб.
Corriere della Sera маълумотларига кўра, Милан апелляция суди 21 март куни Уссни АҚШга экстрадиция қилишни маъқуллаганидан икки кун ўтиб, у электрон билагузугини синдириб, квартирани ижарага олган уйдан рюкзак билан чиқиб кетган ва ўзини кутиб турган машинада қочиб кетган.
Тергов тахминига кўра, Усс қочиб кетган жойдан бир неча километр узоқликда машинасини алмаштириб, қўшни давлатлардан бири - эҳтимол, Швейцария ёки Словения чегарасига етиб келган.
Милан прокуратурасига кўра, Красноярск губернаторининг ўғли суд тақиқини бузган ҳолда мобил телефондан фойдаланган. Терговчилар россиялик тадбиркорнинг шериклари тармоғини фош қилиш мақсадида қўнғироқларни аниқлашга ҳаракат қилмоқда, деб ёзади Corriere della Sera.
Артем Усс 2022 йил октябр ойида АҚШ расмийларининг илтимосига биноан Милан аэропортида қўлга олинган эди. Қўшма Штатлар россиялик тадбиркорни Америка ҳарбий технологияларини ноқонуний экспорт қилиш ва пул ювишда айблаяпти. У билан бирга Германияда ҳибсга олинган бизнес шериги Юрий Орехов ва яна уч нафар россиялик ишда иштирок этмоқда.
