Германия президенти Франк-Валтер Штайнмайер собиқ канцлер Ангела Меркелга Германиянинг олий мукофоти – «Германия Федератив Республикаси олдидаги хизматлари учун» махсус тоифасидаги Катта хоч орденини топширишни режалаштирмоқда. Дастлаб Stern журнали томонидан эълон қилинган 17 апрелга белгиланган мукофот топшириш ҳақидаги маълумотни 28 март, сешанба куни федерал президент девони вакили тасдиқлади.
Меркелдан олдин Германиянинг олий мукофоти билан фақат собиқ канцлер Конрад Аденауэр (1954 йил) ва Ҳелмут Кол (1998 йил) тақдирланган, дея таъкидлайди нашр, шу йўл билан Штайнмайер Меркелни ўтмишдошлари билан тенглаштирган, бу унинг Россияга нисбатан сиёсати танқид қилинаётгани туфайли тортишувларга сабаб бўлиши мумкин.
Меркелнинг турмуш ўртоғи Йоахим Зауэр ва унинг оиласининг бошқа аъзолари, собиқ канцлер идоралари раҳбарлари - Томас де Мезер, Роналд Пофалла, Питер Альтмаер ва Ҳелге Браун, собиқ таълим вазири Аннет Шаван ва Меркел ҳукуматидаги биринчи вице-канцлер Франц Мюнтеферинг Бельвю саройида бўлиб ўтадиган маросимга таклиф этилганлар рўйхатига киритилди.
Меркел партияси - Христиан-демократик иттифоқининг амалдаги раҳбарияти, шунингдек Христиан-социалистик иттифоқ ва 2009-2013 йилларда коалициядаги консерваторлар блоки ҳамкори - Эркин демократик партия вакиллари таклиф қилинганлар орасида йўқ. Айни пайтда, рўйхатга футбол бўйича Германия миллий жамоасининг собиқ мураббийи Юрген Клинсманн ва бир қанча таниқли олимлар киритилган.
