Февраль ойида юз берган ҳалокатли зилзилалардан кейин ўзбекистонликларнинг хайрия ёрдами доирасида Ҳатай вилоятининг Антокия вилоятида 100 та турар-жой контейнери ўрнатилади. Бу ҳақда Anadolu хабар берди.

Модулли уйлар Истанбулдаги ўзбек диаспораси томонидан 2016 йилда ташкил этилган Seyhun таълим ва маданият уюшмасининг бевосита кўмагида ўрнатилмоқда. Зилзиладан кейинги дастлабки кунларданоқ уюшма ўзбек халқи кўмагида табиий офат ҳудудида иссиқ овқат тарқатишни ҳам ташкил қилган эди.

Умумий майдони 21 кв.м. бўлган контейнер ичида ошхона, ҳожатхона ва ҳаммом ҳам бўлади. Контейнерлар иссиқлик изоляцияси билан жиҳозланган ва турли мавсумий омилларга чидамли. Уларни ўрнатиш 15 кишидан иборат жамоа томонидан амалга оширилади.

Уюшма раҳбари Тоҳир Абдулла сўзларига кўра, уюшма зилзиладан кейинги иккинчи кундан бошлаб, Элбистон вилоятида 17 кун давомида озиқ-овқат ёрдами кўрсатиб, ҳар куни 1000 кишини озиқ-овқат билан таъминлаган.

«Кейинроқ Туркия ҳукумати Фавқулодда вазиятларни бошқариш ва олдини олиш бошқармаси (AFAD) кўрсатмаси билан Антокияга етиб келдик. Овакент ҳудудида 100 та контейнер ўрнатишни режалаштирганмиз. Айни пайтда 80 дан ортиқ контейнер ўрнатиш учун қурилиш материаллари мавжуд. Биз уларни ўрнатмоқдамиз. Контейнерларимизнинг ўзига хос жиҳати шундаки, улар мурват билан маҳкамланган, яъни истак бўлса йиғилиб, кўчирилиши мумкин бўлган тарзда ишлаб чиқилган», деди Абдулла.

Абдулланинг айтишича, Овакент ҳудудида контейнер ўрнатиш ишлари 15 кун ичида якунланади. Бу ҳудудда асосан 1980 йилларда кўчиб келган ўзбек диаспораси вакиллари истиқомат қилади.