Sirdaryo viloyatida yangi qurilgan turar joyning tom qismi eng yuqori qavatdagi kvartira ichiga o‘pirilib tushdi. Bu haqda Raqobatni rivojlantirish va iste’molchilar huquqlarini himoya qilish qo‘mitasi Kun.uz’ga ma’lum qildi.
Ma’lum qilinishicha, fuqaro yangi qurilgan uyning 7-qavatidan kvartira sotib olgan. Qurilish tashkiloti ushbu ko‘p qavatli uyni qurish jarayonida loyiha hujjatlariga o‘zgartirish kiritgan.
Nazorat qiluvchi tashkilotlarga ko‘ra, qurilish pudrat korxonasi ko‘p qavatli uyning tom qismini loyiha hujjatlariga asosan yopmagan. Tom qismini namdan saqlash uchun «Texnonikol XRR» materiali o‘rniga polietilen plyonkalar o‘rnatgach, tomdagi tuynuklar ochilmay qolgan. Natijada tom ostida nam par hosil bo‘lib, pastki qavat uylariga sizib kirgan va xonadonning tom qismi o‘pirilib tushgan.
“Iste’molchilar huquqlarini himoya qilish qo‘mitasining Sirdaryo viloyati hududiy boshqarmasi masalani o‘rganib chiqdi. Boshqarma tomonidan qurilish pudrat korxonasiga bajarilishi majburiy bo‘lgan ko‘rsatma berildi.
Ko‘rsatmaga muvofiq fuqaroga 4-qavatdan maydoni bir xil bo‘lgan o‘lchamdagi kvartira berildi”, – deyiladi ma’lumotda.
Qo‘mita qonunchilikka muvofiq, nuqsonli tovar sotilganda iste’molchi huquqlarini eslatib o‘tgan.
Nuqsonli tovar sotilganda iste’molchi, agar bu hol shartnoma tuzish paytida aytib o‘tilmagan bo‘lsa, o‘z xohishiga qarab quyidagilardan birini talab qilishga haqli:
- tovarni ayni shunday markali (modelli, artikulli) maqbul sifatli tovarga almashtirib berish;
- tovarni boshqa markali (modelli, artikulli) shunday tovarga almashtirib, uning xarid narxini tegishincha qayta hisob-kitob qilish;
- tovarning nuqsonlarini bepul bartaraf etish yoki iste’molchining yoxud uchinchi shaxsning nuqsonlarni bartaraf etishga qilgan xarajatlarini qoplash;
- xarid narxini nuqsonga mutanosib ravishda kamaytirish;
- shartnomani bekor qilib, ko‘rilgan zararni qoplash.
Avvalroq, Yangihayot tumanida mulkdorlar ko‘p qavatli uyning tom qismidan noqonuniy ravishda uy qurib olgani ma’lum qilingandi. Mulkdorlarga nisbatan ma’muriy chora ko‘rilib, noqonuniy qurilmalarni 15 kun ichida bartaraf etish bo‘yicha ko‘rsatmalar berilgandi.
