O‘zbekiston va Polsha kosmik tadqiqotlar bo‘yicha hamkorlik qiladi

O‘zbekiston Raqamli texnologiyalar vazirligi huzuridagi Kosmik tadqiqotlar va texnologiyalar (“O‘zbekkosmos”) agentligi va Polshaning Creotech Instrumens SA kompaniyasi vakillari o‘rtasida videomuloqot tashkil etildi, deb xabar bermoqda “Dunyo”.

Videomuloqot chog‘ida O‘zbekistonning Varshavadagi elchisi Bahrom Boboyev, “O‘zbekkosmos” agentligining departamenti direktori Ismoil Rasulov, Polsha tomonidan Creotech Instrumens SA kompaniyasi vitse-prezidenti Yatsek Kozek ishtirok etdi. Onlayn uchrashuvda Creotech Instrumens SA kompaniyasining taqdimoti doirasida kompaniyaning ish tajribasi hamda mavjud texnologiyalari va ishlab chiqilgan loyihalari ko‘rib chiqildi.

“O‘zbekkosmos» agentligi tomonidan ham taqdimot o‘tkazildi. Unda O‘zbekiston kosmik sohasining kun tartibi, kosmik infratuzilmani rivojlantirish doirasidagi milliy ehtiyojlar, ishlab chiqilgan hamda rejalashtirilayotgan loyihalar muhokama etildi.

Uchrashuv yakunida ikki tomonlama muzokaralarni davom ettirish maqsadida joriy yil 25 - 27 aprel kunlari Toshkentda o‘tkaziladigan Koinot texnologiyalari konferensiyasida ishtirok etish uchun Creotech Instrumens SA kompaniyasi delegatsiyasining O‘zbekistonga safarini tashkil etish hamda tegishli hamkorlik memorandumi va “Yo‘l xaritasi”ni imzolash yuzasidan kelishuvlarga erishildi.

Creotech Instrumens SA – Polshada sun’iy yo‘ldosh tizimlari va komponentlari ishlab chiqaruvchi, kvant kompyuterlarini boshqarish tizimlari uchun ilg‘or elektronika, uchuvchisiz uchish apparatlarini boshqarish tizimlari uchun qurilmalar va dasturiy ta’minotlarni yetkazib beradigan yetakchi kompaniya hisoblanadi.