Donald Tramp o‘ziga qarshi olib borilayotgan surishtiruvni «Stalinistik Rossiya dahshatli shousidan kelib chiqqan narsa» deb atadi. Oq uy rahbari lavozimi uchun yana kurashmoqchi bo‘lgan AQSh sobiq prezidenti 25 mart kuni Texasning Ueyko shahrida bo‘lib o‘tgan saylovchilar bilan uchrashuvda shunday bayonot berdi.

Trampning so‘zlariga ko‘ra, unga qarshi tergov harakatlari «boshidanoq jodugarlar ovi va birin-ketin soxta surishtiruvlar bo‘lgan». Siyosatchi o‘z tarafdorlari oldida bu ishlar bo‘yicha mas’ul prokurorlarni tanqid qildi, ularning ba’zilari «Jodugarlar ovi» deb yozilgan plakatlarni ko‘tarib turgan, deb xabar beradi Reuters.

Nyu-York prokuraturasi Trampga nisbatan aktrisa Stormi Deniyels bilan aloqalari oshkor bo‘lmasligi uchun 130 ming dollar to‘lagani ishi bo‘yicha surishtiruv o‘tkazmoqda. Bu o‘z-o‘zidan jinoyat emas, biroq versiyalardan biriga ko‘ra, Tramp o‘z saylovoldi jamg‘armasidan pul to‘lash uchun foydalangan, bu jiddiy qoidabuzarlik hisoblanadi.

Bundan tashqari, hozirda Trampga nisbatan ikki politsiyachi va 11 kongressmen tomonidan berilgan fuqarolik da’volari sudda ko‘rib chiqilmoqda. Ular 2021 yil 6 yanvarda Vashingtondagi zo‘ravonlik uchun sobiq prezidentni javobgar deb hisoblayapti va tovon puli talab qilyapti.