Россияда кичик ҳуқуқбузарликлар учун мамлакатдан чиқариб юборилган меҳнат мигрантларига нисбатан амнистия эълон қилиш таклиф этилди. Бундай ташаббус билан Давлат думасининг иқтисодий сиёсат қўмитаси раиси ўринбосари Артём Кирянов чиқди. 

Унинг сўзларига кўра, бу чора Россия меҳнат бозорига бир неча ўн мингдан 200 минггача хорижлик ишчиларни жалб қилишга ёрдам беради, бу эса Россия қурилиш мажмуасини энг кўп қизиқтиради, деб ёзди «Российская газета». 

Кичик ҳуқуқбузарлик содир этган фуқароларни амнистия қилиш таклиф этилмоқда. Бу асосан ҳужжатларни ўз вақтида расмийлаштирмаган ёки мамлакатни тарк этиши кечиктирилган одамлардир. 

Депутатнинг қайд этишича, ҳали депортация қилинмаган хорижликлардан ҳам жазони олиб ташлаш мумкин. 

Аввалроқ, Россиядан депортация қилинган хорижлик қурувчилар учун амнистия зарурлигини НОСТРОЙ президенти Антон Глушков ҳам қайд этган эди. Унинг сўзларига кўра, иммиграция қонунчилигини бузгани учун депортация қилинган мигрантлар сони жуда кўп. 

Росстат маълумотларига кўра, 2022 йил якуни бўйича Ўзбекистоннинг 6,9 минг нафар фуқароси ишлаш учун рухсатнома олган. 1 млн 215 минг нафарида эса патент бор.