Prezident Shavkat Mirziyoyev 27 mart kuni investitsiya, eksport va xalqaro hamkorlik masalalari bo‘yicha yig‘ilish o‘tkazdi.

Rasmiy relizga ko‘ra, O‘zbekistonda eksport qiluvchi korxonalar soni besh yilda 4 500 tadan 7 200 tagacha ko‘paygan. Eksport qilinayotgan mahsulot turlari ham 1 500 tadan qariyb 3 mingtagacha oshib, geografiyasi 139 ta mamlakatdan 164 taga yetgan. Tayyor mahsulot eksporti 2 baravarga, ularning tovarlar eksportidagi ulushi 50 foizdan 65 foizga oshgan.

Qayd etilishicha, 2023 yilda qariyb 11 milliard dollar to‘g‘ridan to‘g‘ri xorijiy investitsiyalarni o‘zlashtirish rejalashtirilgan. Hududlarda 23 milliard dollarlik 12 mingta yangi loyiha, shu jumladan, 3 mingdan ziyod sanoat loyihalari ishga tushirilishi belgilangan. Yig‘ilishda mutasaddilar shu boradagi ishlar yuzasidan hisobot berdi.

Yil boshidan 764 mln dollar xorijiy investitsiya o‘zlashtirilgani, 1 300 ta yirik va o‘rta loyihalar ishga tushirilgani qayd etildi. Eksport 3 milliard dollarni tashkil qilgan.

Prezident ishga tushadigan loyihalar ijrosini hududlar va tarmoqlar kesimida kunlik nazorat qilib, muammolarni hal qilib borish zarurligini ta’kidladi. Yangi bozorlarni o‘zlashtirish, yangi transport yo‘laklarini topish bo‘yicha ko‘rsatmalar berildi. Mahsulotlar sifatini oshirish va tannarxini tushirish muhimligi qayd etildi.

Yuqori texnologik va qo‘shilgan qiymatli mahsulotlarni mahalliylashtirishga qaratilgan loyihalarni moliyalashtirish tizimini joriy qilish, Investitsiyalar, sanoat va savdo vazirligida Sanoat siyosati tadqiqotlari markazini tashkil etish bo‘yicha topshiriqlar berildi.