Yangilanayotgan Konstitutsiya: “Endi bolalar mehnati taqiqlanadi. Paxta, supurgi, ketmon bolalarniki emas”

O‘zbekiston 12:58 / 25.03.2023 9139

Yangi tahrirdagi konstitutsiyaning 44-moddasida majburiy mehnat, bolalarning barkamol rivojlanishiga salbiy ta’sir qiladigan har qanday bolalar mehnati taqiqlanishi belgilab qo‘yilyapti. Ushbu muhim o‘zgarish aynan majburiy mehnat, xususan, bolalar majburiy mehnatiga to‘liq barham berilishi bilan bog‘liq.

44-moddaga ko‘ra, sud qarori bilan tayinlangan jazoni ijro etish tartibidan yoxud qonunda nazarda tutilgan boshqa hollardan tashqari majburiy mehnat taqiqlanadi. Bolalar mehnatining bolaning sog‘lig‘iga, xavfsizligiga, jismoniy, aqliy va ma’naviy jihatdan to‘laqonli rivojlanishiga xavf soluvchi, shu jumladan uning ta’lim olishiga to‘sqinlik qiluvchi har qanday shakllari taqiqlanadi.

Majburiy mehnatga konstitutsiya darajasida chek qo‘yilishi avvalo o‘quv muassasalaridagi ta’lim sifati yaxshilanishiga ta’sir qiladi. Chunki, mavsumiy dala ishlari erta bahorda paxtani yagona qilishdan kuzda uni terib olishgacha davom etar, bu davrda ijtimoiy soha vakillari, asosan o‘qituvchilar daladan beri kelmasdi. Talabalar va yuqori sinf o‘quvchilarining majburiy mehnatga jalb qilinishi oddiy holga aylangandi. Hatto boshlang‘ich sinf o‘quvchilari ham paxta terimiga olib chiqilgan. Mavsum paytida o‘tilmagan darslar esa o‘zlashtirilmay qolib ketavergan.

Majburiy mehnatning konstitutsiya darajasida taqiqlanishi iqtisodiyot va ijtimoiy soha rivojlanishiga, odamlarning hayot sifati yaxshilanishiga xizmat qiladi. 

Ko‘proq yangiliklar: