Qarshi tumanidagi “Omad START” korxonasida “Konstitutsiya meniki, seniki, bizniki. Konstitutsiya o‘zimizniki!” shiori ostida targ‘ibot tadbiri o‘tkazildi.

Unda jamoat arboblari, madaniyat va san’at sohasi xodimlari, faol xotin-qizlar, iqtidorli yoshlar qatnashdi.

Tadbirda so‘zga chiqqanlar yangilanayotgan Konstitutsiyaning insonlar hayotida tutgan o‘rni, unga kiritilayotgan yangi qo‘shimchalar va ularning ahamiyati haqida gapirdi. Shuningdek, xalqimizni 30 aprel kuni o‘tkazilishi kutilayotgan referendumda faol ishtirok etishga da’vat qildi.

Tadbirda yangilanayotgan Konstitutsiyaga kiritilayotgan o‘zgarishlar, xususan, xotin-qizlar, oila va yoshlar masalalariga oid takliflar ko‘proq e’tirof etildi.

“Bir necha yillardan buyon rahbarlik lavozimlarida ishlab kelyapman. Joylarda xotin-qizlar bilan deyarli har kuni muloqotda bo‘lishimga to‘g‘ri keladi. Qashqadaryo misolida aytadigan bo‘lsam, bizda qizlarning oliy o‘quv yurtlarida o‘qishiga yetarlicha e’tibor qilinmasdi. Xalqimiz ham tanlov imkoni bo‘lganda ko‘proq o‘g‘il farzandlarini o‘qitishga intilardi. 2021 yildan boshlab xotin-qizlarning oliy o‘quv yurtlarida tahsil olishi uchun qator imtiyozlar berila boshlandi. Bu imtiyozlar asosan ehtiyojmand oilalar farzandlariga qo‘llanyapti. Deyarli har yili yuzlab xotin-qizlar tavsiyanoma asosida oliy o‘quv yurtlariga o‘qishga kiryapti. Bu raqamlar yildan yilga ortib borayotgani quvonarli. 2022 yildan boshlab magistraturaga qabul qilingan xotin-qizlarimizning kontrakt to‘lovini davlat tomonidan to‘lab berish tartibi joriy qilindi. Bakalavrda o‘qiyotgan qizlarimizga ham qator qulayliklar berilyapti. Bu tez orada jamiyatimizning barcha jabhalarida xotin-qizlar rolining ham ortib borishini ta’minlaydi, albatta. Bu o‘zgarishlarni e’tirof etmay bo‘ladimi? Yangilanayotgan Konstitutsiyamizning butun bir bobi oilaga, farzandlarimizga bag‘ishlanyapti. Shunday ekan, o‘zini yurt ertasiga daxldorman degan inson borki, bu siyosiy jarayonlarga befarq qaramasligi kerak, deb hisoblayman”, dedi Qashqadaryo viloyati oila va xotin-qizlar boshqarmasi boshlig‘i Komila Karomova.

Tadbirda yoshlar va sportchilar nomidan so‘zga chiqqan MMA bo‘yicha jahon chempioni Bobur Qurbonov ham 30 aprel kuni bo‘lib o‘tadigan siyosiy jarayonlarda faol qatnashishini ma’lum qildi.

Gala konsert formatida tashkil qilingan tadbirda el tanigan aktyorlar hamda san’atkorlarning chiqishlari odamlarga iliq kayfiyat bag‘ishladi.