Bosh prokuraturaning xabar berishicha, Toshkent shahar madaniyat bosh boshqarmasi tomonidan qonunchilik talablari buzilib, tender tanlovlari o‘tkazilmasdan, festival tadbirlarini o‘tkazish uchun turli firmalar bilan 20 mlrd so‘mlik to‘g‘ridan to‘g‘ri shartnomalar tuzilgan.

Ushbu festivallar amalda 2022 yilning may-sentabr oylarida o‘tkazib bo‘lingan. Ammo qonun buzilishlarni yashirish maqsadida “etender.uzex.uz” maxsus axborot portaliga 24 oktabr va 3 noyabr kunlari poytaxtda 5 ta festival tadbirlarini o‘tkazish haqida nomigagina e’lon va hujjatlar joylashtirilgan hamda shartnomalar tuzilgan.

O‘tkazilgan tekshirish jarayonida amalda bajarilmagan ishlar va ko‘rsatilmagan xizmatlar uchun 8 mlrd so‘mlik budjet mablag‘lari talon-toroj qilingani aniqlangan.

Holat yuzasidan Toshkent shahar madaniyat bosh boshqarmasi mansabdor shaxslari va boshqalarga nisbatan jinoyat ishi qo‘zg‘atilgan. Hozirda tergov harakatlari o‘tkazilmoqda.

Kun.uz oldinroq ushbu mavzuda surishtiruv e’lon qilgandi. Unda aytilgandiki, Toshkent shahar madaniyat bosh boshqarmasi “Tashkent Opera Fest”, “Tashkent Food Fest”, “Tashkent Flower Fest”, “Tashkent Art Week”, “Tashkent Music Fest”, “Tashkent Dance Fest” hamda “MuzzDay Fest” festivallari uchun 18,2 mlrd so‘m sarflagan. Qator shartnomalar tendersiz tuzilgan. Qo‘shimcha ravishda o‘tkazilgan tenderlar festivallar o‘tib bo‘lganidan bir necha oy keyin tashkil etilgan va ularda ham to‘g‘ridan to‘g‘ri shartnomani olgan firmalar g‘olib deb topilgan.

Festivallar asosan 4 ta – “Profi Event”, “Media Globe”, “Modern Celebration” va “Perfect Organizer” firmalariga bo‘lib berilgan.